نرخى نەوت بەرز بووەوە

وریا فەتاح

لە دوێنێوە نرخى نەوت بەرەو بەرزبوونەوە هەنگاویناوە، ئەمڕۆش 82 دۆلارى تێپەڕاند.

به‌ پێی داتاکانی بۆرسه‌ی جیهانی وزه‌، نرخی به‌رمیلێك نه‌وتی خاوی برێنت بۆ ئەمڕۆ چوارشەممە، بە 82 دۆلار و 28 سەنت مامەڵەى پێوە دەکرێت، بەمەش 0.36 سەنت بەرز بوونەوەى بەخۆیەوە بینیوە.

نرخی نه‌وتی خاوی رۆژئاوای ته‌كساسی ئه‌مریكا بە 78 دۆلار و 34 سەنتە، بەڕێژەى 0.44 سەنت بەرز بوونەوەى بەخۆیەوە بینیوە.

بەپێى ئاژانسى هەواڵى رۆیتەرز، خواستى زۆر لەسەر نەوت و کڕینى لەلایەن ئەمەریکاوە بۆ زیادکردنى یەدەگى ستراتیژى، دوو هۆکارى سەرەکى بەرز بوونەوەى نرخى نەوتن.

وڵاتانی هەناردەکاری نەوت رێککەوتن تا ساڵی 2025 بەرهەمهێنانی نەوت بە کەمی بهێڵنەوە و رێژەکەی زیاد نەکەن، ئەوەش لەپێناو بەرزبوونەوەی بەهاکەی لە بۆرسەی جیهانیدا.

رۆژى پێنجشه‌ممەى رابردوو‌، عه‌بدولعه‌زیز بن سه‌لمان، وه‌زیری وزه‌ی سعودیه‌ رایگه‌یاند، هاوپه‌یمانیی ئۆپێك+ ده‌توانێت زیادبوونی به‌رهه‌مهێنان رابگرێت یان هه‌ڵبوه‌شێنێته‌وه‌، ئه‌گه‌ر بۆی ده‌ركه‌وت بازاڕه‌كه‌ به‌هێز نییه‌.