ژینگەی هەڵەبجە یەک مانگی بۆ کێڵگەی پەلەوەری سیروان دانا

964+
ئەحمەد مستەفا

فەرمانگەی ژینگەی هەڵەبجە ماوەی یەک مانگی بۆ کێڵگەی پەلەوەری سیروان دانا، “خەڵک بە فەرمانگەکەیان وتووە، پاشماوەی لە ناوچەکە فڕێداوە و  بووە بەهۆکاری بڵاوبوونەوەی بۆنی ناخۆش”.

مۆڵەتەکەی فەرمانگەی ژینگەی هەڵەبجە، لە 8.5.2024 بۆ 8.6.2024  دەخایەنێت و دەبێت کێشەی پاشماوەکان چارەسەر بکات.

ئەمڕۆ پێنجشەممە 9.5.2024، سەرهەنگ عەبدولڕەحمان، بەڕێوەبەری فەرمانگەی ژینگەی هەڵەبجە بە 964ـی وت، “پاشماوەی پرۆژەی کێڵگەی پەلەوەری سیروان، بووە بە هۆکاری پیسکردنی ژینگە و بڵاوبونەوەی بۆنی ناخۆش و مێش و سەرچاوەیەکە بۆ بڵاوبونەوەی نەخۆشی و زیانگەیاندن بە ھاوشارییان و کێڵگە کشتوکاڵییەکان”.

بە قسەی ئەو، “پاش سەردانی لیژنەی سەرپێچی ژینگەیی فەرمانگە بۆ پرۆژەکە و تۆمارکردنی سەرپێچیەکە، پاڵپشت بە رێنمایی ژمارە دووی ساڵی 2022 ی دەستەی پاراستن و چاککردنی ژینگە تایبەت بە بەرزەفتکردنی سەرپێچییە ژینگەییەکان و کۆنوسی لیژنەی پشکنین و بەدواداچوونی فەرمانگە، ماوەی یەک مانگ مۆڵەت دراوە بە پرۆژەکە بۆ چارەسەرکردنی کێشەی پاشماوەکانی”.

خەڵک سکاڵا و نیگەرانییان بە فەرمانگەکە گەیاندووە، بەڕێوەبەری فەرمانگەی ژینگەی هەڵەبجە ئەوەشی وت، “ئەگەر کێڵگەکە کێشەی پاشماوەکانی چارەسەر نەکات، بە پێچەوانەوە لە دوای بەرواری دیاریکراو و رێکاری یاسایی و ئیدارییان لەبەرامبەر دەگرینەبەر”.

فەرمانگەی ژینگەی هەڵەبجە لە بڕینەوەی چوار دار دەکۆڵێتەوە

فەرمانگەی ژینگەی هەڵەبجە 20 هەزار نەمامی بەخشیوە