سەگە جۆخۆرەکەی خەلیفان
ئەو سەگەی مەیلی گۆشتخواردنی نەماوە و خووی داوەتە جۆ
964+
ئاکام غەفوور – سۆران
لە خەلیفان سەگێک هەیە سەری لە خۆی و خاوەنەکەشی شێواندووە، رزقی بزنەکانی بڕیوە، هەتا جۆ هەبێت نان و گۆشت ناخوات.
کارزان رەشید خەڵکی خەلیفانەو خاوەنی سەگەکەیە، خۆی شوانەو چەند بزنێکی هەیە، لە پاڵ ئەوەشدا حەزی لەبەخێوکردنی مریشک و مەل و باڵندەو خۆی وتەنی ”دەعبا”یە، ئەم سەگەش ئەوەندە تێکەڵی ئاژەڵ و باڵندەکان بووە مەیلی گۆشتخواردنی نەماوەو خووی داوەتە جۆ.
کارزان دەڵێت نان و گۆشت بۆ سەگەکە دابنێ، بەڵام سەگەکەی چاوەڕێیە تا جۆ بۆ بزنەکان رۆبکات، ئەویش لەگەڵیان سەر دەنێتە ناو ئاخوڕەکە و تا مڕ دەبێت جۆ دەخوات.
سەیر ئەوەیە بزنەکان بەمە راهاتوون و تەنیا رێگە بەو سەگە دەدەن لە رزقەکەیان شەریک بێت، هەر سەگێکی تر لە خواردنەکەیان نزیک ببێتەوە لێی دەدەن و دەیدەنە بەر قۆچان.
سەگەکە هەم بووەتە شەریکە بەش و هەم بووەتە شوانی بزنەکان، خۆی بەیانیان دەیانباتە ئەو دەشتودەرە، دەیانلەوەڕێنێت و ئێوارەش دەیانهێنێتەوە.