بازاڕی شیلک لە سلێمانی. وینە :964
بەڵام بەرهەمەکە کەمە
شیلکی بازیان پێگەیشتووە و خواستێکی زۆری لەسەرە
964+
پێشەوا محەمەد
شیلکی بازیان پێگەیشتووە و لەناو بازاڕی قەزاکە و عەلوەی سلێمانی خواستی زۆری لەسەرە، کشتوکاڵی بازیان دەڵێت، بەرهەمی شیلکیان کەمە، بەڵام بەتام و چێژە.
چەند رۆژێکە بەرهەمەکە پێگەیشتووە و تا ناوەڕاستی مانگی پێنج بەروبوومی دەمێنێت.
جەلال مەحمود، خاوەنی هەشت خانووی پلاستیکییە لە قەزای بازیان و چواریانی کردووە بە شیلک، بە 964ـی وت، بەرهەمی شیلکەکەیان دەنکی گەورە و سوور و تام و بۆنێکی زۆر خۆشی هەیە.
وتیشی، “بەرهەمەکەمان هێندە خواستی لەسەرە چەند هەفتەیەک بەر لە پێگەیشتنی لە عەلوەکانەوە دێنە لامان و پێشوەختە بەرهەمەکەمان لێدەکڕن”.
لە سنووری قەزای بازیان 16 هەزار خانووی پلاستیکی بوونیان هەیە، کە زۆرینەیان تەماتە و خەیار و کولەکە و سەوزە و هەندێ میوەشی تێدا بەرهەمدەهێندرێت، کە لەناویاندا شیلک هەیە.
زانیار تۆفیق، بەڕێوەبەری کشتوکاڵی بازیان بە 964ـی راگەیاند، بەرهەمی شیلکیان لە سنوورەکەیان زۆر نییە، بەڵام بەهۆی کوالێتی و خۆشییەکەیەوە خواستێکی زۆری لەسەرە.
وتیشی، “ئێمە بەردەوام لە رێگەی لیژنە زانستییەکانەوە چاودێریی ئەو خانووە پلاستیکیانە دەکەین تا دەرمانی کیمیایی بە رێژەی رێگەپێدراو بۆ بەروبوومەکان بەکاربهێنن”.
