نەخۆشخانەی منداڵانی رانیە - فۆتۆ تایبەت بە 964
نەخۆشخانەی فێرکاریی رانیە
964 بەدواداچوونی بۆ شکانی شانی منداڵێک کرد
+964
ژێوار خدر – راپەڕین
دوای ئەوەی خێزانێکی رانیە منداڵەکەیان دەکەوێت و دەیبەنە بەشی فریاکەوتنی نەخۆشخانەی فێرکاری رانیە، پێیان دهڵێن هیچ نییه، دواتر له نهخۆشخانهیهكی ئههلی پشكنینی بۆ دهكهن، دهركهوتووه شانی شكاوه.
بڵباس سمکۆ، باوکی منداڵەکە قسەی بۆ 964 کرد و وتی: منداڵەکەم لەسەر جۆلانە کەوت و بردمان بۆ بەشی فریاکەوتنی نەخۆشخانەی فێرکاری رانیە، دوای پشکنین پێیان وتین منداڵەکەتان هیچ کێشەیەکی نییە و ئازارشکێنیان پێداین، بەڵام دوای ئەوەی تا دەهات ئازاری زۆرتر دەبوو، دوای چەند رۆژێک بردمان بۆ نەخۆشخانەیەکی تایبەت و لەوێ دەردەکەوت کە منداڵەکە ئێسکی شانی شکاوە.
باوکی منداڵەکە باسی لەوە کرد پزیشکی شکاوی پێی راگەیاندوون، بەهۆی ئەوەی تەمەنی منداڵەکە بچوکە و ساڵ و نیوێکە، ناتوانرێ و شوێنەکەی هی ئەوە نییە نەشتەرگەری بۆ بکرێت و دەبێت خۆی یەکبگرێتەوە.
964 بۆ بەدواداچوون بۆ ئەم بابەتە پەیوەندی کرد بە نەخۆشخانەی فێرکاریی رانیە، فەرمان ئەحمەد بەڕێوەبەری کارگێڕیی نەخۆشخانەی فێرکاری رانیە وتی: کێشە لە ئامێرەکانماندا نییە و هۆکاری دەرنەکەوتنی شکاویی منداڵەکە دەکرێت بابەتێکی تر بێت، زۆرجار شکان راستەوخۆ دەرناکەوێت و دەکرێ سەرەتا تەنیا لێکترازانێک، یان درزێک بووبێت و ئەمەش زۆرجار لە تیشک دەرناکەوێ، بەڵام دەکرێ دوای دەرچوونیان لە نەخۆشخانە و جوڵاندنی زیاتری ئێسکەکە، بووبێتە هۆی لەجێدهرچوونی زیاتری ئێسکەکە و شکانی، کە ئەمە هۆکارە بۆ ئەوەی لە جاری دووەمدا شکانەکە لە تیشکەکەدا دەرکەوتبێت.
وتیشی، ئامێرەکانی پشكنین له نهخۆشخانهی حكومی هیچ جیاوازییەکیان ینیە لەگەڵ ئەو ئامێرانەی لە نەخۆشخانە ئەهلییەکاندا هەن و هەڵەش ناکەن.
فەرمان ئەحمەد روونیشی کردەوە، دەکرێ پزیشکەکەش هەستی پێنەکردبێت و نەیتوانیبێت شکانەکە ببینێت لەو کاتەدا، بۆیه ئەوان خۆیان بەدواداچوون بۆ بابەتەکە دەکەن و پەیوەندی بە خێزانەکەوە دەکەن و سەیری تیشکەکە دەکەنەوە، ئەگەر دەربکەوێت پزیشکەکە نەیتوانیبێت شکاوییەکە دیاریی بکات، لێپرسینەوەی لەگەڵدا دەکرێت و رێوشوێنی یاسایی بەرامبەر دەگیرێتە بەر.
پێداچوونەوە: ئەرسەلان عەبدوڵا
