دیمەنی کۆبوونەوەی لایەنە بەشدارەکانی بناغەکردنی ناوەندی بەڵگەنامەی نیشتمانی _ وێنە: وەزارەتی رۆشنبیری
باڵەخانەی تایبەتمەندی دەوێت
رێکارەکانی دروستکردنی ناوەندی بەڵگەنامەی نیشتمانی دەستپێدەکات
964+
ئەحمەد مستەفا
لە وەزارەتی رۆشنبیری و لاوانی هەرێمی کوردستان، تاوتوێی رێکارەکانی دامەزراندنی “ناوەندی بەڵگەنامەی نیشتمانی” كرا و رێکارەکانی دامەزراندنی لە دابینکردنی باڵەخانەیەکی تایبەتمەندەوە دەستپێدەکات.
دامەزراندنی ئەو ناوەندە نیشتمانییە، یەک پاکێجە لەگەڵ جێبەجێكردنی دەقی یاسای ژمارە 1ی ساڵی 2022ی پەرلەمانی كوردستان، “یاسای پاراستنی بەڵگەنامەی نیشتمانی لە هەرێمی كوردستان – عێراق”، كە ئەركی دامەزراندنی ناوەندەكەی بە وەزارەتی رۆشنبیری و لاوان سپاردووە.
بە گوێرەی بڕگەی یەكەمی ماددەی پێنجەمی یاساكە، وەزیری رۆشنبیری و لاوان سەرۆكایەتی ئەنجومەنێك دەكات بۆ رێكخستن و پلاندانان و جێبەجێكردنی پڕۆژەكە و نوێنەری لایەنە پەیوەندیدارەكان تێیدا ئەندام دەبن، لەوانە، (وەزارەتی خوێندنی باڵا، پەروەردە، شارەوانی و گەشتوگوزار، ئەوقاف، شەهیدان و ئەنفالكراوان و فەرمانگەی رێكخراوە ناحكومییەكان).
بە قسەی نامیق هەورامی، وتەبێژی وەزارەتی رۆشنبیریی بێت بۆ 964، بە پێكهێنانی (ناوەندی بەڵگەنامەی نیشتمانی هەرێمی كوردستان – عێراق)، هەرێمی كوردستان دەبێتە خاوەنی ناوەندێكی نیشتمانی بۆ كۆكردنەوەی بەڵگەنامە و دەستنووس و پاراستنی ئەرشیفی كوردستان.
بە قسەی وتەبێژی وەزارەتەکە بێت، وەزیر محەمەد حەمەسەعید لە کۆبوونەوەکەدا وتویەتی، پێویستە لەسەر بنەمای ستانداردی نێودەوڵەتی كار بۆ بنیاتنانی ئەو ناوەندە و رێكارەكانی كۆكردنەوە و پاراستنی بەڵگەنامەكان بكرێت و لە سەرەتاوە دەبێت باڵەخانەی ناوەندەكە تایبەتمەند بێت بەو بوارە و هەموو رێكارێكی پیویست بگیرێتە بەر بۆ پاراستنی ئەرشیڤ و بەڵگەنامەكان.
لە هەرێمی کوردستان ژمارەیەک ناوەند هەن بۆ پاراستن و سۆراغکردنی بەڵگەنامە، لەوانە ناوەندی کوردستان بۆ دۆکیۆمێنت و لێکۆڵینەوەی ئەکادیمی کە سەر بە زانکۆی سلێمانییەوە و دەیان دەنووس و بەڵگەنامەی تێدا پارێزراوە، تەنانەت ژمارەیەکیان بە ئەلیکترۆنی کراون.
کوردستان دەبێتە خاوەنی کتێبخانەی نیشتیمانی
بەشی شوێنەواری زانکۆی سلێمانی ئەمساڵ ئاوەدانە
وەزارەتی رۆشنبیری پرۆژەیەکی وەرگێڕان جێبەجێدەکات
