لە گەرمیان
رێگایەکی دوور دەبڕن بۆ دۆزینەوەی دۆمەڵان و دەڵێن تامی لە گوشت خۆشترە
964+
سیروان خورشید – دوزخوماتوو
وەرزی پەیدابوونی دۆمەڵان لەسنوری خورماتوو دەستیپێکردووە و هاوڵاتییان رێگەیەکی دوور و درێژ دەبڕن بۆ دۆزینەوەی.
بەقسەی ئەوانە بێت شارەزاییان هەیە لە دۆزینەوەی دۆمەڵان دەڵێن، دۆزینەوەی دۆمەڵان شارەزایی و ئەزمونی دەوێت و ساڵانە لەوەرزی بارانبارین و هەورە بروسکە سەرهەڵدەدات و دۆزینەوەشی ئاسان نیە.
بورهان عادل شارەزا لەدۆزینەوەو سودەکانی دۆمەڵان بۆ 964 قسەدەکات، ساڵانە لەگەڵ هاتنی وەرزی بەهاردا و دوای بارانبارین بەشێک لەهاوڵاتیان روو لەدەشتاییەکانی سنوری خورماتوو و گەرمیان دەکەن بۆ دەستکەوتنی ژەمێکی بەتام یاخود بۆ فرۆشتن لەبازاڕەکاندا،
دەشڵێت، دۆمەڵان بەرهەمێکی خۆڕسکە و لە خاکێکی قومەڵانی دوای بارانبارین و هەورە بروسکە سەرهەڵدەدات و دۆزینەوەشی ئاسان نیە، بەڵام خواردنێکی دڵخوازی گەرمیانیەکانەو ئەوانەی جارێک تامیان کردبێت گوێ بە شەکەتی و ماندوبون نادەن و بەتامەزرۆیەوە بەدوایدا دەگەڕین و نرخەکەی لەگۆشت گرانترە.
ناوچەکانی گەرمیان نیشتمانی سەرەکی دۆمەڵانە و بەرهەمیان زیاتر لەو ناوچەیە، بەگشتی قەبارەیان بچوک و مامناوەندە، لەهەندێ شوێنی ناوچەکە دۆزاوەتەوە قەبارەی دۆمەڵانێک یەک کیلۆ گرام دەبێت.
دۆمەڵان چوار رەنگی هەیە، سپى، زەرد، رەش و قاوەیی، خەڵک خواستی لە دۆمەڵانی رەنگ قاوەییە، ئەمەش بەپێی قسەی شارەزایان.
ئێستا نرخی کیلۆیەک دۆمەڵان لەبازاڕەکانی خورماتوو و گەرمیاندا لە 30 هەزار دینارەوە دەست پێ دەکات تا 100 هەزار و نرخی رەنگە قاوەییەکەشی لە رەنگەکانی تر جیاواز و گرانترە.
