خۆڵ و پاشماوە جێبهێڵن سزا دەدرێن

964+

پێشەوا محەمەد

شارەوانیی سلێمانی هۆشداری دەداتە هاوڵاتیان لە کاتی سەردانکردنیان بۆ شوێنە گەشتیارییەکان خۆڵ و پاشماوەکانیان جێنەهێڵن، چونکە وەک دەڵێن سزای بەدواوەیە.

لەبەرئەوەی لەمەودوا وەرزی زستانە، تیمەکانی شارەوانی لە سەرجەم ناوچە گەشتیارییەکان پاککردنەوەیان ئەنجام داوە و بۆ پێشوازی لە گەشتیاران و هاوڵاتیان بە پاک و خاوێنی ئامادەیە.

زەردەشت رەفیق، وتەبێژی شارەوانیی سلێمانی بە 964ـی وت، “ئەوانەی دەچنە چیای ئەزمەڕ و گۆیژە و شەقامی دەباشان و شەقامی بەرەو تونێلی پێشڕەو پێویستە پاشماوەی خۆڵ وخاشاک لە شوێنی تایبەت بەخۆی کۆبکەنەوە و لە ناوچە گەشتیارییەکاندا سەلەی تایبەت بە کۆکردنەوەی خۆڵ بوونی هەیە”.

وتیشی، “بۆ هاوڵاتیان کۆکردنەوەی خۆڵ و خاشاکەکەی هەمووی چەند دەقەیەکی پێویستە، بەڵام هی هەموو سەیرانگا یان ناوچەی گەشتیارییەک بۆ کارمەندانی پاککەرەوە و شارەوانییەکان دەبێتە بارێکی گران و ئەرکێکی زۆر”.

ساڵانە لە وەرزی گەشت و سەیران و چوونەدەرەوەی هاوڵاتیاندا شارەوانییەکان و فەرمانگەکانی ژینگە بە شێوازی جۆراوجۆر هاوڵاتیان لە پاکڕاگرتنی ناوچە گەشتیارییەکان ئاگادار دەکەنەوە.

وتەبێژەکەی شارەوانیی سلێمانی وتیشی، “پیسکردنی ناوچە گەشتیارییەکان لە لایەن هەرکەسێکەوە بێت ئەگەر پاکی نەکاتەوە بە سەرپێچی دادەندرێت”.

شارەوانیی سلێمانی تا مانگی پێنج قیرتاوکردنی راگرتووە