ئۆپەراسیۆنەکەی هەسەدە لە کەمپی هۆل کۆتایی هات

پێشەوا محەمەد

ئۆپەراسیۆنە ئەمنییەکەی هەسەدە لە کەمپی هۆل دوای 10 رۆژ کۆتایی هات، خۆیان دەڵێن 85 چەکداری داعشیان دەستگیر کردووە و سەردەیەکی ئەو رێکخراوەش کوژراوە و دەستیان بەسەر بڕێک مادەی هۆشبەریشدا گرتووە.

فەرماندەیی گشتیی ھێزەکانی ئاسایشی ناوخۆی باکوور و رۆژھەڵاتی سوریا لە کۆنفرانسێکی رۆژنامەوانیدا کۆتایی ھاتنی ئۆپەراسیۆنی “مرۆیی و ئەمنی”ـیەکەیان راگەیاند، کە قۆناغی سێیەمی ئۆپەراسیۆنەکەیان بووە.

لە کۆنفرانسە رۆژنامەوانییەکەدا ئاماژە بەوەش کراوە، لە ئۆپەراسیۆنەکەدا یەکینەکانی پاراستنی ژنان و هێزەکانی هاوپەیمانان هاوکاریان بوون.

“ئۆپەراسیۆنەکە بۆ رێگریکردن بووە لە پیلانەکانی داعش بۆ خۆڕێکخستنەوە لە کەمپی ھۆل، ھەموو سێکتەرەکانی کامپەکە پشکنینیان بۆ کرا و لە ئەنجامدا توانرا، ئەبو سوفیان لاھیبی لێپرسراوی شانەکانی داعش لەناو کەمپی ھۆل کوژرا، ھەروەھا ژنێکی ئێزدی بە ناوی کۆڤان ئیدۆ خورتۆ رزگارکرا”، فەرماندەیی گشتیی ھێزەکانی ئاسایشی ناوخۆی باکوور و رۆژھەڵاتی سوریا وایان وتووە.

هەر لەو ئۆپەراسیۆنەدا پێنج تونێلی داعش لەناوبراون و ژمارەیەک چەک و تەقەمەنی و کەرەستەی سەربازیش دەستیان بەسەردا گیراوە.

لە 28ـی ئازاری 2021 ئۆپەراسیۆنی یەکەمی مرۆیی و ئەمنی دژی شانەکانی داعش لە لایەن هێزەکانی ئاسایشی ناوخۆ، هەسەدە و یەپەژەوە دەستیپێکرد. ئۆپەراسیۆنەکە پێنج رۆژی خایاند و 125 ئەندامی شانە نووستووەکانی داعش دەستگیر کران.

قۆناغی دووەمی ئۆپەراسیۆنەکە لە 25ـی ئابی 2022 دەستیپێکرد و 24 رۆژی خایاندووە.

کەمپی هۆل دەکەوێتە پارێزگای حەسەکە لە رۆژئاوای کوردستان، نزیکەی 68 هەزارکەس لە کەسوکاری چەکدارانی داعش تێیدا دەژین، کە خەڵکی سووریا و عێراق و وڵاتانی دیکەی جیهانن و لەوانەش 43 هەزاریان منداڵن.