خانووى هاوڵاتییەکى گوندى گەڵاڵە خاپوور کرا

وریا فەتاح

بەرەبەیانى ئەمڕۆ، لە رێگەى فڕۆکەى جەنگییەوە، خانووى هاوڵاتییەکى گوندى گەڵاڵەى قەزاى ماوەت بۆردومان کرا.

کامەران حەسەن، قایمقامى قەزاى ماوەت بە 964ى وت،”کاتژمێر 1:00ى بەرەبەیانى ئەمڕۆ، لە رێگەى فڕۆکەى جەنگییەوە، خانووى هاوڵاتییەکى گوندى گەڵاڵە بۆردومانکرا و بە تەواوى خاپورکرا”.

بە وتەى قایمقامى ماوەت، لە رووداوەکەدا هیچ زیانێکى گیانى نەبووە، چونکە شەوى رابردوو خێزانەکە لە سلێمانى بوون و بە رێککەوت رزگاریان بووە و لە ماڵەوە نەبوون.

“خانووەکە لە سنوورى گوندى گەڵاڵەیە و چەند سەد مەترێک لە خوار گوندەکەوەیە و ماڵى هاوڵاتییەکە بەناوى ساڵح رەسوڵ، کە هاوڵاتییەکى گوندەکەیە و بە شایەدى خەڵکى گوندەکەش ئەو کەسە هاوڵاتییەکى مەدەنى و بێ کێشەى دانیشتوى گەڵاڵەیە”، قایمقامى ماوەت واى بە 964 وت.

قایمقامى ماوەت وتیشى،”هەرچەندە لە بۆردومانەکەدا زیانى گیانى نەبووە، بەڵام خانووەکە بە تەواوى خاپوور بووە و کەلوپەلەکانى ناو ماڵەکەش لەناوچوون”.

لاى خۆیەوە، کامەران مەلا عوسمان، ئەندامى تیمى کوردستانى رێکخراوى (CPT)، بە 964ى وت،”بۆردومانەکە لە رێگەى فڕۆکەى جەنگییەوە ئەنجامدراوە و ئەو ماڵەشى کە خاپورکراوە کەوتووەتە باسکى قەلێکى گوندى گەڵاڵە”.

ئەوەش لە کاتێکدایە، شەوى رابردوو، دەنگى فڕۆکەى جەنگى بە بەردەوامى لە سنورى قەزاى پشدەر و شارباژێر و باڵەکایەتى بیستراوە.