لە سلێمانی پێنج هەزار کەمئەندام ماون فۆڕم پڕ بکەنەوە

پێشەوا محەمەد

لە 16 هەزار کەمئەندام کە لە سلێمانی هەن، 11 هەزاریان فۆڕمەوە دڵنیایی مانەوە لە ژیانیان پڕکردووەتەوە و سەرۆکی یەکێتیی کەمئەندامانیش داوا دەکات ئەو فۆڕمە پڕبکرێتەوە.

فۆڕمەکە لە لایەن وەزارەتی کار و کاروباری کۆمەڵایەتییەوە بڵاوکراوەتەوە و تا رۆژی پێنجشەممە 25.1.2024 کەمئەندامان دەتوانن پڕی بکەنەوە.

بە وتەی سامان حسێن، سەرۆکی یەکێتیی کەمئەندامانی کوردستان کە بۆ 964 قسەی کردووە، نزیکەی 90 هەزار کەمئەندام موچە وەردەگرن و “نزیکەی 16 هەزاریان لە سنووری سلێمانیدان”.

دەشڵێت، پڕکردنەوەی ئەو فۆڕمە گرنگە بۆ ئەوەی کەمئەندامان بیسەلمێنن ئەو موچەیەی وەریدەگرن شایستەیانە و لە ژیاندا ماون.

بە پێی ئەو مەرجانەی وەزارەتی کار و کاروباری کۆمەڵایەتی بڵاوکردوونەتەوە، هەر کەمئەندامێک لە کاتی پڕکردنەوەی فۆڕمەکەدا پێویستە:

*خودی کەمئەندام خۆی ئامادە بێت.

*دوو وێنەی مامەڵەی خۆی پێبێت.

*ناسنامەی موچە وەرگرتنی پێبێت.

*کارتی نیشتمانی یان  ناسنامەکەی پێبێت.

*ئەو کەمئەندامانەی موچەی وارسی شەهید یان خانەنشینی وەردەگرن و گرێبەستەکە بەناوی ئەوانەوەیە پێویستە گرێبەستەکەیان پێبێت.