دیمەنێک لە رووباری دیجلە لە ناوچەی بەعاجی قەزای شەرگات- وێنە: 964
عێراق داواکاری هەیە
50% پشكی ئاوی عێراق له لایه‌ن توركیاوه كه‌مكراوه‌ته‌وه
964+
ئەرسەلان عەبدوڵا
گفتوگۆكانی عێراق و توركیا له باره‌ی پرسی ئاو بێ ئه‌نجام بوون، به پێی زانیاریی ئەندامێکی لیژنەی کشتوکاڵی په‌رله‌مانی عێراقیش، 50%ی پشكی ئاوی عێراق له لایه‌ن توركیاوه كه‌مبووه‌ته‌وه.
له رۆژانی رابردوو عێراق و توركیا له باره‌ی پرسی ئاو و به‌ردانه‌وه‌ی ئاو له توركیاوه بۆ عێراق كۆبوونه‌وه، به‌ڵام زۆزان كۆچه‌ر ئه‌ندامی لیژنه‌ی كشتوكاڵ له په‌رله‌مانی عێراق له لێدوانێكی رۆژنامه‌وانیدا ئاشكرای كرد، “تا ئێستا تورکیا وەڵامی داواکارییەکانی عێراقی نەداوەتەوە”.
ئه‌ندامه‌كه‌ی لیژنه‌ی كشتوكاڵ ده‌ڵێت، عێراق داوایكردبوو پشكی ئاوی رووباری دیجله بۆ 500 مه‌تر سێجا له چركه‌یه‌ك زیادبكرێت و رووباری فوراتیش 300 مه‌تر سێجا له چركه‌یه‌دا به‌ربدرێته‌وه، به‌ڵام هێشتا توركیا وه‌ڵامی نه‌داوه‌ته‌وه.
زۆزان كۆچه‌ر ئاشكرای ده‌كات، به هۆی دروستكردنی یه‌كێك له به‌نداوه‌كان له‌لایه‌ن توركیاوه، 50%ی پشكی ئاوی عێراق كه‌میكردووه.
ئه‌و پێی وایه پێویسته گفتوگۆیه‌كان چڕتر بكرێنه‌وه، بۆ ئه‌وه‌ی رێككه‌وتن بكرێت و سامانی ئاو له نێوان هه‌ردوو وڵات به یه‌كسانی دابه‌ش بكرێت.
ئاوی رووباری دیجله له توركیاوه به خاكی هه‌رێمی كوردستاندا دێن و دواتر به‌ره‌و ناوچه‌كانی ناوه‌ڕاست و باشووری عێراق ده‌ڕۆات، له‌م ساڵانه‌ی دواییشدا به‌هۆی بنیادنانی ده‌یان به‌نداو له لایه‌ن توركیاوه، رێژه‌ی ئاوه‌كه كه‌مبووه‌ته‌وه و هه‌ندێك ناوچه‌ی عێراقدا بووه‌نه‌ته وشكانی.
هه‌رچی رووباری فوراته، لە باکووری کوردستان (ناوچە شاخاوییەکانی باشووری رۆژھەڵاتی تورکیا)، سەرچاوە دەگرێت و دەڕژێته رۆژئاوای کوردستان (باکووری سووریا) و شانبەشانی دیجلەوە بە ناو خاکی عێراقدا تێدەپەڕێت.
