پۆلیسی زاخۆ هۆکاری دانانی بازگە کاتییەکانی وت

ئەحمەد مستەفا

پۆلیسی زاخۆ بۆ سێ هۆکار دەستیکردووە بە دانانی مەفرەزەی گەڕۆک، بەوتەی وتەبێژەکەیان بێت، دانانی مەفرەزە گەڕۆکەکان لە دەروازە و گەڕەکەکانی زاخۆ بەردەوام دەبێت.

شەوی رابردوو ئەمە چیرۆکی زاخۆ بوو، لە چەندین ناوچە و کۆڵان هێز دانرابوون و بازگەی کاتیی دروستکرابوون.

لەبارەی هۆکاری دانانی ئەو بازگە کاتییانە، ئەحمەد رەمەزان، وتەبێژی پۆلیسی زاخۆ بە 964ی وت، دانانی مەفرەزە گەڕۆکەکان بۆ پاراستنی ئارامی شار، دەستگیرکردنی تۆمەتبارە داواکراوەکان و کەلوپەلی قەدەغەکراو بووە.

هەردوو بەشی پۆلیسی چالاکە مەدەنییەکان و پۆلیسی فریاکەوتن، لە هەڵمەتەکەدا بەشدارییان پێکراوە، ئەو وتی، ئەم هەڵمەتە لە دەروازە و چەند گەڕەکێکی زاخۆ بەردەوامی دەبێت و هێزەکانیان بازگەی کاتیی دادەنێن.

بە وتەی بەڕێوەبەرایەتی پۆلیسی هەرێمی کوردستان بێت، هەزار و 422 تۆمەتبار کە کەیسی جۆراوجۆریان لەسەرە لە هەرێم ماون دەستگیربکرێن، لەو ژمارەیە تەنیا نۆ کەس دەکەونە سنوری زاخۆ.