دیمهنێكی دهرهوهى نه‌خۆشخانه‌ى پیرمام ... وێنه: راگهیاندنى نه‌خۆشخانه
به‌شی نوێشی بۆ زیاد ده‌كرێت
چه‌ند به‌شێكی نه‌خۆشخانه‌ى پیرمام ده‌كرێنه سیستمى ئه‌لیكترۆنى
964+
فه‌رهاد حه‌سه‌ن
چه‌ند به‌شێكى نوێ بۆ نەخۆشخانەی گشتى پیرمام له ناوه‌ندى ئه‌م قه‌زایه زیاد ده‌كرێن و سیستمى ئه‌لیكترۆنیش بۆ چه‌ند به‌شێكی داندرا.
ماوه‌یه‌كه كارى نۆژه‌نكردنه‌وه له نه‌خۆشخانه‌ى پیرمام ئه‌نجام ده‌درێت و ئه‌و به‌شانه‌ى بۆى زیاد كراون بریتین له به‌شی چاره‌سه‌رى سروشتى و چاودێرى چڕ.
د. كامه‌ران عومه‌ر به‌ڕێوه‌به‌رى نه‌خۆشخانه به 964ـى وت، له‌گه‌ڵ نۆژه‌نكردنه‌وه‌ى نه‌خۆشخانه‌كه‌یاندا هۆڵى چاودێری نه‌خۆش و ده‌رگاى سه‌ره‌كى نه‌خۆشخانه دروستكراون و كراونه‌ته سستمى ئه‌لیكترۆنى.
وتیشی “به‌شی چاودێرى سروشتی دروستكراوه‌و له پلانیشماندایه له داهاتوو به‌شه‌كانى وه‌ك قه‌سته‌ره‌ى دڵ و هۆڵى نه‌شته‌رگه‌رى و چاودێری چڕیش دروست بكرێن”.
به قسه‌ى به‌ڕێوه‌به‌رى نه‌خۆشخانه، بڕى 248 ملیۆن دینار لەسەر بودجەی پارێزگای هەولێر، بۆ ئه‌و كارانه ته‌رخانكراوه و له‌لایه‌ن رێكخراوێكیشه‌وه هاوكارى مادى بۆ دروستكردنى به‌شی چاره‌سه‌رى سروشتى كراوه.
