شەش مانگی دیکە قەدەغەی گەشتەکانی فڕۆکەخانەی سلێمانی درێژکرایەوە

964+

ئەحمەد مستەفا

دەسەڵاتی فڕۆکەوانی تورکیا بە ئیمەیڵێک بڕیاری درێژکردنەوەی قەدەغەی گەشتەکانی بۆ فڕۆکەخانەی سلێمانی نارد، بەڕێوەبەری فڕۆکەخانەی سلێمانی بە 964ی وت، “تورکیا نەگەیشت بە قەناعەت و شەش مانگی دیکە قەدەغەی سەر گەشتەکانی درێژکردەوە”.

بڕیار وابوو 22.12.2023 قەدەغەی ئاسمانی سلێمانی بۆ گەشتی فرۆکەی هێڵی ئاسمانی و ئەو فڕۆکانەی ئاسمانی تورکیا بۆ سلێمانی بەکاردەهێنن هەڵبگیرێت، بەڵام پێچەوانەکەی روویدا و تا 22.6.2024 قەدەغەکە لەلایەن تورکیاوە درێژکرایەوە.

ئەمڕۆ شەممە 23.12.2023، هەندرێن هیوا موفتی، بەڕێوەبەری فڕۆکەخانەی نێودەوڵەتی سلێمانی ئەوەی بە 964 وت، “فڕۆکەخانەی سلێمانی لایەنی هونەری و جێبەجێکارە، بەڵام دەزانین کە لەسەر ئاستی حکومی و سیاسی هەوڵ هەبوون تا قەدەغەی سەر گەشتەکان هەڵبگیرێن، ئەوەش تورکیای نەگەیاند بە قەناعەت پێکردن”.

لەبارەی ئەوەی ئەوان وەک فڕۆکەخانە قسەیان چییە، هیوا موفتی وتی، “هەموو رێکارە هونەری و خزمەتگوزارییەکانی فڕۆکەخانە بێ گرفت بەڕێوەدەچن، وە سەرجەم کۆمپانیاکانی دیکەی فڕۆکەوانی لەسەر کاری خۆیان بەردەوامن، وەک تورکیا ئەسبابی سیاسییە دەبێت خۆی بگات بەو قەناعەتەی گەشتەکان دەستپێ بکاتەوە”.

سەرچاوەیەکی ئەمنی: بە درۆن هێرشکراوەتە سەر فڕۆکەخانەی سلێمانی

دۆسیەی ئەمنی فڕۆکەخانەی عەربەت رادەستی پێشمەرگە کرا