ئەمساڵ زۆپا قوتابخانەکانی خەبات گەرم دەکاتەوە
“قوتابخانەکانی سنوورەکە نەوتیان وەرگرت”
میدیازان – سەعید محەمەد – هەولێر
بۆ ئەمساڵ قوتابخانەکانی سنووری قەزای خەبات لەهەولێر هەر زوو نەوتیان وەرگرت و ئەم زستانە بە زۆپا خوێندکاران گەرم دەبنەوە.
بەڕێوەبەرایەتی پەروەردەی خەبات لە هەولێر نەوتی سپی بەدەست گەیشتووە و لەئێستادا دەستیکردووە بە دابەشکردنی نەوتەکە بەسەر قوتابخانەکانی سنووری قەزاکەدا.
سەنگەر عەلی، بەڕێوەبەری کارگێڕی بەڕیوەبەرایەتی پەروەردەی خەبات بە میدیازانی راگەیاند، وەکو ئامادەکاری بۆ سەرما و سۆڵەی زستان دەستیان کردووە بە دابەشکردنی نەوتی سپی بەسەر قوتابخانەکاندا و سەرەتاش لە سەنتەری قەزاکەوە دەستیان پێکردووە و دواتریش قوتابخانەکانی شارۆچکە و گوندەکانی خەبات دەگرێتەوە.
بۆ سنووری پەروەردەی خەبات 162 هەزار لیتر نەوتی سپی دابین کراوە، بۆ هەر هۆبەیەک لە قوتابخانەکان 50 لیتر نەوت دابەشدەکرێت. بەڕێوەبەری کارگێڕی پەروەردەی خەبات دەڵێت، ئەگەر قوتابخانەیەک 4 هۆبەی هەبێت 200 لیتری پێدەدرێت.
لە سنووری قەزای خەبات 165 قوتابخانە هەیە و سەنگەر عەلی بەڕێوەبەری کارگێڕی پەروەردەی خەبات دەڵێت، هیچ قوتابخانەیەک لە نەوتەکە بێبەش ناکرێت و لە ماوەیەکی نزیکدا ئەو بڕە نەوتەی بەدەستیان گەیشتووە دەگاتە هەموو قوتابخانەکان.
لە سنووری قەزای خەبات نزیکەی 60 گوند هەیە و قەزاکە دەکەوێتە رۆژئاوای هەولێر، لەسەر رێگەی هەولێر – موسڵ بە دووری 35 کیلۆمەتر لە شاری هەولێرەوە هەڵکەوتووە.