چەوری خواردنی چێشتخانەکانە
چەوری زێرابەکانی شەقامی ئیسکانی داپۆشیووە
964+
فەهمی نەبی
بەڕێوەبەرایەتی ئاو و ئاوەڕۆی هەولێر چەند وێنەیەکی بڵاوکردوەتەوە، تیمەکانیان سەرقاڵی پاکردنەوەی زێرابەکانی شەقامی ئیسکانن، بەڕێوەبەری ئاوەڕۆی هەولێر دەڵێت “بووەتە یەک پارچە لە چەوری و دەبەی ئاو”.
زەردەشت عەبدولخاڵق سەرسام بەڕێوەبەری ئاو و ئاوەڕۆی هەولێر بۆ 964 دەڵێت، بەشی زۆری چێشتخانەکان پاشماوەی رۆنی خواردنەکان دەخەنە ناو زێرابەکانەوە و ئەو پاشماوەیەی هەیە هی دوکان و چێشتخانەکانە، بەشی زۆری کات کە زێرابەکانی شەقامی ئیسکان دەگیرێن هەبوونی رێژەیەکی زۆری چەورییە.
بەوتەی بەڕێوەبەری ئاو و ئاوەڕۆی هەولێر رۆژی وا هەیە پاشماوەی خۆراک و پاککردنەوەی زێرابەکان دەگاتە سێ بارهەڵگری شەش تۆنی.
بازاڕی ئیسکان دەکەوێتە چەقی شاری هەولێر، یەکێکە لەو بازاڕانەی شەو و رۆژ ناخەوێت و جمەی دێت، بە خواردنی خێرا و چایخانەکانی بەناوبانگە، لە ساڵانی هەشتا شەقامی سەرەکی گەڕەکی ئیسکان تەنیا چەند دوکانێکی لێبوو، بەڵام ئێستا یەکێکە لە قەرەباڵغترین بازاڕەکانی هەولێر.