دوو هەفتەی رابردوو 40 کۆڵبەر بریندار کراون

پێشەوا محەمەد

بە پێی زانیاریی راپۆرتێکی رێکخراوی مافی مرۆڤی هەنگاو، لە ماوەی دوو هەفتەی رابردوودا 40 کۆڵبەر بریندار کراون و سێ کۆڵبەریش کوژران.

رێکخراوەکە کە چاودێریی رەوشی مافی مرۆڤی رۆژهەڵاتی کوردستان دەکات لە راپۆرتەکەیدا، کە رۆژی هەینی 17.11.2023 بڵاوی کردووەتەوە دەڵێت، سەرجەم بریندار و کوژراوەکان بە تەقەی راستەوخۆی هێزە ئەمنییەکان بووە.

بەپێی زانیارییەکانی رێکخراوەکە، لە سەرەتای ئەم مانگەوە زۆرترین کۆڵبەر بوون بە قوربانی لە چاو سەرجەم مانگەکانی ئەمساڵەوە.

“کۆڵبەرەکان لە سنووری بانە و کرماشان و نەوسوود بریندار کراون و کوژراون و سەرجەمیشیان بێ ئاگادارکردنەوەی پێشوەختە تەقەیان لێکراوە”، راپۆرتەکەی هەنگاو وادەڵێت.

کۆڵبەری کارێکە دانیشتوانی شارەکانی رۆژهەڵاتی کوردستان بۆ پەیداکردنی بژێویی ژیان پەنای بۆ دەبەن و کەلوپەلی پێویست لە سنوورەکانی هەرێمی کوردستانەوە بە رێگای شاخاویدا دەبەنە شارەکانی رۆژهەڵاتی کوردستانەوە.