ژمارەیەک کۆڵەبەر لە سنووری ناوچە شاخاوییەکانی رۆژهەڵات - وێنە: socialmedia
دووانیان برینیان سەختە
کۆڵبەرێک کوژرا و هەشتی تریش بریندار کران
964+
پێشەوا محەمەد
لە سنووری هەنگەژاڵەی بانە و سنوورەکانی نەوسوود تەقە لە ژمارەیەک کۆڵبەر کراوە، یەکێکیان کوژراوە و هەشتی دیکەش بریندار بوون، ئەوە بەپێی زانیارییەکانی رێکخراوی هەنگاو، کە چاودێری رەوشی مافی مرۆڤی رۆژهەڵاتی کوردستان دەکات.
بەپێی زانیاریی رێکخراوەکە، ئەو کەسەی کوژراوە ناوی ئازاد ستارپەنایە و خەڵکی سەقزە و تەمەنی 43 ساڵە و باوکی دوو منداڵە.
“هێزە ئەمنییەکانی ئێران تەقەی راستەوخۆیان لەو کۆڵبەرانە کردووە و دووانی تریشیان بە سەختی بریندارن”، رێکخراوی هەنگاو وادەڵێت.
رێکخراوەکە ئاماژەی بەوەش داوە، هێزە چەکدارەکانی ئێران لە سنووری پارێزگای کرماشان تەقەیان لە کۆمەڵێک کۆڵبەر کردووە و لانی کەم شەش کۆڵبەری خەڵکی شاری سەلاسی باوەجانی بریندار بوون. “سنگ و کەمەر و دەستی ئەم کۆڵبەرانە بە گولـلەی ئەو هێزانە پێکراون و بە مەبەستی تیمارکردن و چارەسەریی پزیشکی بۆ نەخۆشخانەی قودس لە شاری پاوە گواستراونەتەوە”.
