ترەمپ قسەى نوێى هەیە؛ گفتوگۆ لەگەڵ ئێران دەکەن

وریا فەتاح

دۆناڵد ترامپ، سەرۆکی ویلایەتە یەکگرتووەکانی ئەمریکا، کەمێک لەمەوبەر لە نوێترین لێدوانیدا دەربارەی جەنگی دژ بە ئێران جەختیکردەوە، کە 5 رۆژ مۆڵەتی تریان داوەتە تاران بۆ ئەوەی مەرجەکان قبوڵ بکەن، ئەگەرنا “دەچینە ئەو شوێنە و لەناوی دەبەین”. کە مەبەست لێى وێستگەى بەرهەمهێنانى کارەبا بوو.

ترامپ ئاماژەی بەوە کرد کە ئێرانییەکان رازی بوون چەکی ئەتۆمییان نەبێت و وتی: “ئەوان ئاشتییان دەوێت و هیوادارین خزمەتێک بە رۆژهەڵاتی ناوەڕاست بکەین، بەڵام کاتێک زانیم ئێران لە دانوستانەکاندا بە چەکی ئەتۆم هەڕەشە دەکات، نەمتوانی زیاتر بوەستم و هێرشمان کرد.”

گرنگترین خاڵەکانی لێدوانەکەی ترامپ:

-هێزی ئاسمانی و دەریایی ئێرانمان بەتەواوی لەناوبردووە و توانا سەربازییەکانیان نەماوە.

-هەموو سەرکردەکان کوژراون و ئێستا دۆخی ئێران جیاوازە.

-بەنیاز بووین وێستگەکانی کارەبای ئێران بسڕینەوە کە 10 ملیار دۆلاریان تێدا خەرج کردووە، بەڵام نامانەوێت ئەوە بکەین؛ هیوادارم ئێران ناچارمان نەکات لێیان بدەین.

-دەمانەوێت بەرنامەی ئەتۆمی و موشەکی ئێران بە تەواوی نەمێنێت.

سەرۆکی ئەمریکا جەختی کردەوە کە ئەم 5 رۆژە دەرفەتێکی باشە بۆ هەمووان، ئەگەر تاران وەری بگرێت، ئەوا “زۆر باش دەبێت بۆ هەموو لایەک”.