ژمارەی گیانلەدەستدانی رووداوەکەی حەمدانیە بەرز بوویەوە

964+

فەهمی نەبی

رووداوی ئاگر گرتنی هۆڵی هەیسەم لە قەزای حەمدانییە نزیک دەبێتەوە لە هەفتەیەک بەڵام رۆژ دوای رۆژ ژمارەی گیان لەدەستدان بەهۆی کاریگەری ئاگرەکەوە بەرز دەبێتەوە و ئەمڕۆ ژمارەیان بوو بە 113 حاڵەتی مردن.

ئەمڕۆ دووشەممە، بەڕێوەبەرایەتی تەندروستی نەینەوا رایگەیاند، ژمارەی گیانلدەستدان بەرزبووەتەوە و بەراورد بە دوێنێ شەش کەس مردوون، دوێنێ ئاماری گیان لەدەستدان 107 بوون و ئەمڕۆ بووەتە 113 حاڵەتی مردن.

بەپێی ئامارەکەی بەڕێوەبەرایەتی تەندروستی نەینەوا 12 بریندار نێردراون بۆ دەرەوەی وڵات، سێیان لەوانەی سووتاون لە نەخۆشخانەی کۆماری موسڵن، لە نەخۆشخانەی حەمدانیە پێنج و 11 لە هەولێر و لە دهۆک شەش حاڵەتی سووتانی رووداوەکە ماون.

بەڕێوەبەرایەتی تەندروستی نەینەوا رایگەیاندووە 41 کەس لەوانەی سووتاون ناناسرێنەوە و پێنجیان تەنیا چەند پارچەیەکیان لێ ماوەتەوە.

وەزارەتی ناوخۆی حکومەتی عێراق دوێنێ ئەنجامی لێکۆڵینەوەی رووداوەکەی بڵاوکردەوە و رایگەیاند، هۆکاری کەوتنەوەی ئاگرەکە یارییە ئاگرییەکان بووە و دەستی ئەنقەست نەبووە.

هەرێم پاسپۆرتی بێبەرامبەری بۆ بریندارانی کارەساتەکەی حەمدانیە دابینکرد

به‌شێكی دیكه‌ی بریندارانی حه‌مدانیه‌ ره‌وانه‌ی ده‌ره‌وه‌ی عێراق كران