بەغدا تیمێکی پزیشکی دەنێرێتە هەڵەبجە

پێشەوا محەمەد

بە بڕیاری سەرۆکوەزیرانی عێراق تیمێکی پزیشکی بۆ چاودێری رەوشی بەرکەوتوانی چەکی کیمیایی دەنێردرێتە هەڵەبجە.

تیمەکە تێچوو و چۆنێتی چارەسەرکردنی بەرکەوتووەکان ئامادە دەکات.

ئازاد مستەفا، بەڕێوەبەری تەندروستی هەڵەبجە بە 964ـی وت، “پێشتر ئێمە چووینەتە بەغدا و داوامان کردووە تیمی تایبەت بۆ چاودێری و چارەسەری بەرکەوتوانی چەکی کیمیایی بێنە هەرێم و لەسەر ىوودجەی بەغدا چارەسەریان بکرێت، بەڵام هیوادارین ئەو تیمە زوو بگەن”.

ئاماژەی بەوەش دا، نەخۆشی چاو، پێست، دڵ و هەناسە لە دیارترین نەخۆشی ئەو بەرکەوتوانەن.

بە پێی زانیارییەکانی تەندروستی هەڵەبجە، تا ئێستا ژمارەی دیاریکراوی بەرکەوتوان دیار نییە، چونکە بەردەوام داواکاری هەیە و ئێستا لە هەڵەبجە زیاتر لە دوو هەزار، لە سلێمانی 500 و لە هەولێر سێ هەزار داواکاری هەیە کە دەڵێن بەرکەوتەی چەکی کیمیایین.