بە نەخشەڕێگایەک چاکسازی لە کەرتی گەشتیاری هەرێمدا دەکرێت

964+

پێشەوا محەمەد

دەستەی گەشتوگوزار بە هاوكاری رێكخراوەکانی  UNDP و USAID نەخشەڕێگایەکی چاکسازییان بۆ کەرتی گەشتیاری هەرێم راگەیاند و لە نۆ تەوەردا خۆی دەبینێتەوە.

نەخشەڕێگاکە لە بووارەکانی چاكسازیی یاسا، رێنماییەكان، پەیكەری كار و پەیكەری رێكخراوەیی، پلانی ستراتیژیی گەشتوگوزار، شوێنە كولتووری و رۆشنبیرییەكان، مۆڵەتی گەشتیاری، هەڵسەنگاندنی كوالێتی، پەرەپێدانی ژێرخان، پەروەردە و خوێندن و راهێنان کارا دەبێت.

ئیبراهیم عەبدولمەجید، وتەبێژی دەستەی گەشتوگوزاری هەرێم بە 964ـی راگەیاند، راوێژکارێکی نێودەوڵەتی دوای لێکۆڵینەوە لە کەرتی گەشتوگوزاری هەرێم کۆمەڵێک راسپاردەی لەو بووارانەدا پێشکەشکردووە بۆ جێبەجێکردنیان و بەرەوپێشبردنی گەشتوگوزار.

وتیشی، “بەپێی نەخشەڕێگاکە ناوچە گەشتیارییەکانی هەرێم بۆ هەر چوار وەرزەکە ئامادە دەکرێن و وا دەکرێت گەشتیاران بتوانن بێ جیاوازی وەرزەکان سەردانی ناوچە گەشتیارییەکانی کوردستان بکەن”.