پشدەر دەبێتە خاوەن ئامێری MRI

964+

هاوبەش ئەبوبەکر

قەزای پشدەر لە ئیدارەی راپەڕین، دەبێتە خاوەنی ئامێری پزیشکی MRI و وەزارەتی تەندروستی هەرێم بۆ ئەو مەبەستە داوای زیاتر لە دوو ملیار دیناری کردووە.

لە نوسراوێکدا بۆ وەزارەتی دارایی، کە واژوی سامان بەرزنجی وەزیری تەندروستی لەسەرە، داوای دوو ملیار و 250 ملیۆن دینار کراوە بۆ کڕینی ئامێرەکە.

“ئەم بڕە پارەیە لەسەر بودجەی ساڵی 2023ـی بەڕێوەبەرایەتی گشتی تەندروستی راپەڕین خەرج دەکرێت”، سامان بەرزنجی وا دەڵێت.

تەها محەمەد، لێپرسراوی راگەیاندن و پەیوەندییەکانی تەندروستی راپەرین هەواڵەکەی بۆ 964 پشتراستکردەوە و وتی، “داوای سیتی سکانیشمان کردووە”.

ئامێری MRI بۆ وێنەگرتنی ئەناتۆمی لەشی نەخۆشەکانە و پشكنینێكه‌ بە شێوەی تيشك دەکرێت بۆ دیاریکردنی نەخۆشییەکان.

سیتی سکان ئەو زیانانە دەردەخات، کە بەر ئێسک کەوتوون، هەروەها کێشەی سییەکان و شێرپەنجەش دیاریی دەکات.