لە پەرلەمانی عێراق چی روویدا؟

964+
ژووری هەواڵ

شەوی رابردوو، پەرلەمانی عێراق بە مەبەستی پەسەندکردنی پرۆژەیاسای بودجەی سێ ساڵی داهاتووی وڵاتەکە کۆبووەوە، شەش مادەی ناو پرۆژەکە پەسەندکران و کۆبوونەوەکە دواخرا بۆ کاتژمێر 1ی دوانیوەڕۆی ئەمڕۆ هەینی.

لە کۆبوونەوەکەدا، دەنگ بە مادەکانی یەکەم، سێیەم، پێنجەم، شەشەم، حەوتەم و هەشتەم درا و مادەی دووەم هەڵگیرا چونکە کێشەی ناڕوونی زمانەوانی تیادابوو، هەروەها مادەی چوارەم لادرا کە تایبەت بوو بە دەسەڵاتێکی ئەنجومەنی وەزیران.

مادەی یەکەمی پڕۆژەیاساکە کە تایبەتە بە نرخی دۆلار و نەوت و پەسەندکرا، تیایدا نرخی یەک بەرمیل نەوتی خاوی بە 70 دۆلار و نرخی 100 دۆلاری بە 130 هەزار دینار جێگیرکرد.

مادەکانی دیکە
مادەى دوو: دواخرا کە تایبەت بوو بە خەرجییەکان

مادەى سێ: تایبەتە بە پاڵپشیى دارایی کەرتى کشتوکاڵ و پیشەسازى و دەسەڵاتى وەزیرى دارایی بۆ ئەو کارە و پەسەندکرا.

مادەى چوار: لادرا کە تایبەتە بە دەسەڵاتى ئەنجوومەنى وەزیران بۆ گواستنەوە لە پارەى تەرخانکراو لە قەرزەکان و گۆڕینى ئەو لایەنەى کە سوودمەند دەبێت لە قەرزەکان.

مادەى پێنج: تایبەتە بە دەسەڵاتى راستەوخۆى خەرجکردنى و رێگرى لە تێپەڕاندنى بڕى تەرخانکراو و پەسەندکرا.

مادەى شەش: تایبەتە بە دەسەڵاتى گواستنەوەى بودجە و پەسەندکرا.

مادەى حەوت: تایبەتە بە دەسەڵاتى بەکارهێنانى یەدەگى بارى لەناکاو و پەسەندکرا.

مادەى هەشت: تایبەتە بە سنووردارکردنى داهات بۆ یەک ساڵ و تاوەکو کۆتایی 2023، پەسەندکرا.

لە پرۆژەکەدا، بودجەی سێ ساڵی داهاتوو بە بڕی نزیکەی 200 ترلیۆن دینار دیاریکراوە. ئەوە گەورەترین بودجەیە لە مێژووی عێراقدا کە نێردرابێتە پەرلەمان.