لە سلێمانی بە مەرجی خزمەتکردن و پاراستن نەمام دابەش دەکرێت

964+

هاوبەش ئەبوبەکر

فەرمانگەی ژینگەی سلێمانی نزیکەی 300 نەمامی بەسەر دانیشتووانی چەند گەڕەکێکی ناو شار و دەوروبەری دابەش کرد و دەڵێت، بە چەند مەرجێک نەمامەکانیان پێداون.

شایی ئاوات، لێپرسراوی هۆشیاری و راگەیاندنی فەرمانگەی ژینگەی سلێمانی بە 964ی راگەیاند، بە مەرجی خزمەتکردن و پاراستن، نەمامەکانیان بەسەر زیاتر لە 10 گەڕەکی ناو شار و شارۆچکەکانی دەوروبەری سلێمانی دابەشکردووە.

“ئەم نەمامانە وەک بەشێك لە پڕۆژەی لە بری سەوزکردنە و لەو پڕۆژە بچوکانە وەرگیراون، کە رووبەرەکانیان لە 150 مەتر کەمترە و دوکانی ئاسایین و توانای سەوزکردنی  10٪ی دوکانەکانیان نییە”، شایی ئاوات وای وت.

بەڵێننامە بە هەموو ئەو ماڵانە پڕکراوەتەوە، کە نەمامەکانیان پێدراوە و دەبێت ئاودان و خزمەتکردنی درەختەکە لە ئەستۆ بگرن و نەهێڵن وشک بکات.

فەرمانگەی ژینگەی سلێمانی ئەم هەڵمەتەی بەبۆنەی رۆژی ژینگەی کوردستان راگەیاندبوو، بەڵام رۆژانی دیکەش ناوبەناو لەم جۆرە هەڵمەتانە ئەنجام دەدەن.