هاتنی ئۆتۆمبێلی شارەکانی دەوروبەر بۆ خورماتوو قەرەباڵغی دروستکردووە

سیروان خورشید – خورماتوو

قەرەباڵغی و سەرەگرتنی ئۆتۆمبێلەکان لە سەرەی بەنزینخانەکانی قەزای خورماتوو تا دێت روو لە زیادبوونە و بووەتە یەکێک لە کێشە سەرەکییەکانی هاوڵاتیان و شۆفێران و ماوەی دوو مانگە دۆخەکە قورستربووە.

بەوتەی شۆفێران و هاوڵاتیانی ناوچەکە، هۆکاری سەرەکی ئەم قەرەباڵغییە بەردەوامە بۆ ئەوە دەگەڕێتەوە کە شۆفێرانی شارەکانی تر، وەکو کەلار، کفری، چەمچەماڵ و ناوچەکانی تری گەرمیان، بە لێشاو روو لە خورماتوو دەکەن بۆ وەرگرتنی بەنزین.

دەشڵێن، لەرابردوو بە چەند خولەکێکی کەم توانیویانە بەنزین وەربگرن، بەڵام لە ئێستادا ناچارن بۆ چەندین کاتژمێر لەسەرەدا رادەوەستن و داوا لە لایەنە پەیوەندیدارەکان دەکەن بە زووترین کات چارەسەرێکی گونجاو بۆ ئەم دۆخە بدۆزنەوە و رێکارێک بگرنەبەر بۆ کەمکردنەوەی فشار و رێگریکردن لە دروستبوونی سەرەی درێژ لە بەنزینخانەکاندا.

پێداچوونەوە: توانا نەقی