وەزارەتی بازرگانی خۆی بۆ وەرگرتنی سکاڵای دژە گەندەڵی ئامادە دەکات

ئەحمەد مستەفا

ئەمڕۆ یەکشەممە، مستەفا نزار عانی وەزیری بازرگانی رێنمایی دەرکردووە بە کردنەوەی کەناڵێکی فەرمی بۆ پێشوازیکردن لەو زانیاری و سکاڵایانەی پەیوەستن بە کەیسەکانی گەندەڵی لە ناو پێکهاتەکانی وەزارەتەکەدا.

نووسینگەی راگەیاندنی وەزارەتی بازرگانی لە راگەیەندراوێکدا ئەمڕۆ 5.7.2026 دەڵێ، لەسەر بنەمای رێنماییەکانی عەلی فالح زەیدی، سەرۆک وەزیران ، بۆ بەهێزکردنی پرۆسەی دەستپاکی و روبەڕووبوونەوەی گەندەڵی و گێڕانەوەی سامانی گشتی، مستەفا نزار عانی، وەزیری بازرگانی رێنماییدا بە کردنەوەی کەناڵێکی فەرمی بۆ وەرگرتنی زانیارییەکان لەسەر گەندەڵی لەناو پێکهاتەکانی وەزارەتەکەدا، ئەمەش بە چاودێری و بەدواداچوونی راستەوخۆی خۆی دەبێت.

هەروەک وەزیر داوای لە هاووڵاتیان و فەرمانبەران کرد بەشداری بکەن لە پشتگیریکردنی هەوڵەکانی بەرەنگاربوونەوەی گەندەڵی، لە رێگەی ناردنی زانیارییەکان بە بەڵگە یان دۆکیۆمێنت کە دەیسەلمێنن گەندەڵی کراوە یان سامانی گشتی بەفیڕۆ دراوە، ئەویش لە رێگەی ئیمەیڵ و ژمارەی تەلەفۆنەکانەوە کە دواتر رادەگەیەنرێن.

هەر بەگوێرەی راگەیەندراوەکە، وەزیری بازرگانی جەختی لەوە کردووەتەوە کە سەرجەم زانیارییەکان بە نهێنییەکی تەواو مامەڵەیان لەگەڵ دەکرێت و لەلایەن خۆیەوە بە شێوەیەکی کەسی و راستەوخۆ بەدواداچوونیان بۆ دەکرێت، هەروەها دۆسیەکان رەوانەی لایەنە پەیوەندیدارەکان دەکرێن بۆ گرتنەبەری رێکاری یاسایی پێویست بەرامبەر بە هەر کەسێک کە تێوەگلانی بسەلمێنرێت.