جی تی ئەی 6 هەر لەئێستاوە بازاڕەکانی شلۆق کردووە

دیلان محەمەجەزا – سلێمانی

یاری جی تی ئەی 6 هەر لەئێستاوە بازاڕەکانی شلۆق کردووە و لە چەند شوێنێک پێشوەختە یارییەکە دەفرۆشرێت کە بڕیارە مانگی 11 بڵاوبکرێتەوە.

ئارا تاریق گەنجێکی ژیرە و شارەزایی باشی لە بواری یارییە ئەلەکترۆنییەکان هەیە، ئەو بە 964ـی وت، “10 ساڵ زیاترە جی تی ئەی هیچ یارییەکی بڵاونەکردووەتەوە، بۆیە ئەم یارییە خواستێکی زۆری لەسەرە لە جیهان و کوردستانیش”.

“بەپێی ئەو داتایانەی بڵاوکراونەتەوە، گوایە لە سەعاتی یەکەمی فرۆشتنی پێشوەختەی جی تی ئەی 6، کۆمپانیاکە یەک ملیار دۆلاری پەیدا کردووە و لە ماوەی 24 سەعاتدا گەیشتووەتە، 39 ملیار دۆلار”، ئارا تاریق وادەڵێت.

قەرارە یارییەکە مانگی 11ـی ئەمساڵ بەفەرمی بڵاوبکرێتەوە و نرخەکەی ئێستا لە بازاڕی سلێمانی بە 45 هەزار دینار و 70 هەزار دینارە، بەشێوەی ئەکتیڤ و ئەکاونت، بەڵام کۆمپانیاکە خۆی بە 80 بۆ 100 دۆلار دەیفرۆشرێت.

سەبارەت بە جیاوازی ئەو نرخە، ئارا تاریق دەڵێت، ئەوان لە سێرڤەری دیکەوە دەیکڕنەوە بۆیە بۆ خۆیان و موشتەرییەکانیان هەرزانتر دەکەوێ.

پێداچوونەوە؛ شۆڕش قادری