یەکەمین ژنەشۆفێری هەولێر لە ئەڵمانیا کۆچی دوایی کرد

عەبدولعەزیز خالند – هەولێر

ئەمڕۆ یەکەمین ژنەشۆفێری هەولێر بەهۆی نەخۆشییەوە کۆچی دوایی کرد و کەسێکی نزیکیشی دەڵێت یەکەمجار سەیارەیەکی جۆری ڤۆڵگای رووسی لێخوڕیوە.

دكتۆرە سامیە شاكر مەشخەڵ، بەرێوەبەری پێشووی قوتابخانەی كارۆخ بووە لە گەڕەكی شۆرشی هەولێر و ئەمڕۆ لە یەكێك لە نەخۆشخانەكانی وڵاتی ئەڵمانیا بەهۆی نەخۆشییەوە گیانی لەدەستداوە.

بەختیار شەعبی، هاوڕێ و کەسی نزیکی دکتۆرە سامیە بە 964 ی وت، بەردەوام پەیوەندی لەگەڵ هەبووە و چوار رۆژ لەمەوبەریش بۆ دوایین جار قسەی لەگەڵ کردووە کە وتوویەتی تەندروستی باش نییە.

وتیشی “لە شەستەکان یەکەمین ژن بووە لە هەولێر شۆفێری کردووە و بووەتە خاوەن مۆڵەتی شۆفێریش”.

باس لەوەدەکات ئەوکات کە شۆفێری کردووە سەیارەیەکی جۆری ڤۆڵگای رووسی هەبووە و کاتێک لێیخوڕیوە منداڵان بەدوای کەوتوون چونکە پێیان سەیر بووە ژنێک سەیارە لێبخوڕێت.

ئاماژەی بەوەشکرد تاوەکو چوار رۆژی دیکە تەرمەکەی دەگەڕێندرێتەوە هەولێر و لە گۆڕستانی شێخ ئەحمەد بەخاک دەسپێردرێت.

پێداچوونەوە: فەرهاد حەسەن