کەسێک گیانی لەدەست دا و 10ی دیکە بریندارن
“چەند جارێک داواکرابوو کاری باڵەخانەکەی کەرکوک رابگیرێت”
964+
کاروان ساڵحی
وتەبێژی فەرماندەیی پۆلیسی کەرکوک رایگەیاند، تا ئێستا لە ئاماری باڵەخانە تەواونەکراوە رووخاوەکەی گەڕەکی وەحدەی کەرکوک، یەک کرێکار گیانی لەدەست داوە و 10ی دیکەش بریندارن، بەڵام یەکێک لە بریندارەکان تەندروستی خراپە، بەرپرسێکی شارەوانییش ئاشکرای دەکات باڵەخانەکە کێشەی یاسایی هەیە و پێیان وتووە کارەکانی رابگرێت.
عەقید عامر شوانی بە 964ی راگەیاند، هیوادارن کەسی تر نەدۆزنەوە لە ژێر بیناکە و برینداری دیکە نەبێت.
وتیشی، تا ئێستا ئەوەی وەک ئامار تۆمارکراوە، یەک کرێکار گیانی لەدەست داوە و 10 کرێکاری تر بریندارن، بەڵام برینی یەکێکیان سەختە.
لەلایەکی دیکەوە بەرپرسی کەرتی سێی شارەوانی ئوسامە دورید رەشید بە 964ی راگەیاند، بینا تەواونەکراوەکە بە نایاسایی کاری کردووە و چەند جارێک خاوەنەکەی تەبیلغ کراوە کارەکانی رابگرێت.
وتیشی، لەگەڵ موختاری گەڕەکەکە چەند جار پێمان وتووە کارەکانی رابگرێ، چونکە ئیجازەکەی لە شارەوانییە و تەنیا تاپۆی هەیە.
هەروەها ئاشکرای کرد، لەگەڵ بەرگریی شارستانی هاتووین کارەکانی رابگرین، بەڵام کرێکارەکان رایاندەکرد و خۆیان دەشاردەوە.
ئێوارەی ئەمڕۆ دووشەممە 27.4.2026 باڵەخانەیەکی تەواونەکراو لە گەڕەکی وەحدەی کەرکوک رووخا و جگە لە ئاماری کوژراو و برینداران، هێشتا تیمەکانی بەرگریی شارستانی بەدوای کرێکاری دیکە لە ژێر داروپەردوودا دەگەڕێن.
پێداچوونەوە: ئەرسەلان عەبدوڵا
