دیمەنی یەکێک لە بۆردومانەکانی سوپای تورکیا لە سنووری ناحیەی دێرەلووک - وێنە؛ ئەرشیفی رێکخراوی CPT.
رێکخراوی CPT:
“بۆردومان و جموجۆڵی سەربازی نوێی تورکیا لە کوردستان پڕۆسەی ئاشتی سست دەکات”
964+
شۆڕش قادری
رێکخراوی CPT ئەمریکی دەڵێت، بۆردوومان و جموجۆڵی سەربازی نوێی تورکیا لە هەرێمی کوردستان، پڕۆسەی ئاشتی نێوان تورکیا و پەکەکە سست دەکات و زیانی پێدەگەیەنێت.
کامەران عوسمان ئەندامی تیمی کوردستانیی رێکخراوی سی پی تی ئەمریکی بە 964ـی وت، “لە دوای نزیکەی شەش مانگ لە ڕاگرتنی هێرش و بۆردوومانەکانی بۆسەر هەرێمی کوردستان بەهۆی دانوستان و پڕۆسەی ئاشتی نێوان دەوڵەتی تورکیا و پارتی کرێکارانی کوردستان، سوپای تورکیا سێ بۆردوومانی لە کوێستانەکانی خنێرە لە سنوری قەزای سیدەکان ئەنجامداوە و بەشێکی “گەلی رەشاڤا”شی لە سنوری ناحیەی دێرەلووک لە پارێزگای دهۆک تەقاندەوە.”
“ئەم پێشهاتانە، جەخت لەسەر ناسکی و لاوازی پڕۆسەی ئاشتی ئەمجارە دەکەنەوە کە هەردوولا بەردەوامن لە جوڵەپێکردنی هێز، فراوانکردنی تۆڕی ڕێگاوبانی سەربازی، لێدانی تونێلی شەڕ، دروستکردنی بارەگای سەربازی نوێ و بەهێزترکردنی بارەگا سەربازییە کۆنەکان”، کامەران عوسمان وادەڵێت.
ئاشکراشیکرد، لە سێ مانگی رابردوو و بەمەبەستی دروستکردنی “ناوچەی دابڕی ئەمنی” بۆ ئامادەیی سەربازی سوپاکەیان، هێزەکانی سوپای تورکیا، فراوانکردنی تۆڕی ڕێگاوبانی سەربازی و توانای لۆجستی سوپاکەیان بەتایبەتی لە سنوری قەزای ئامێدی گەیاندووەتە قۆناغی کۆتایی، سوپای تورکیا تەواوی بنکە و بارەگا سەربازییەکانی خۆی لە ناوچەکانی زاپ، ئاڤاشین، مەتینا و بەرواری باڵا لەڕێگەی تۆڕی ڕێگاوبانی نوێوە بەیەکەوە بەستۆتەوە و سێ کۆمەڵگەی سەربازی نوێی گەورەشیان لە ناوچەکەدا دروستکردووە کە هەر کۆمەڵگەیەکییان، نەخۆشخانە، بنکەی مەشق و ڕاهێنان و تۆپخانەی تێدا جێگیرکراوە.
ئەو ئەندامەی رێکخراوی CPT ئاماژەی بە هێرشەکانی سوپای تورکیا لە ساڵی رابردوودا بۆ سەر خاکی کوردستان لە سنوورەکانی سیدەکان و ئامێدی کرد و دەڵێت، “بەهۆی ئەو هێرشانەوە، لانیکەم هەزار و 192 گوندی زیانیان بەرکەوتووە و ئەوە جگەی لەوەی ژمارەیەکی زۆر گوندنشین ئاوارەبوون و 183 گوندیش چۆڵ کراون، ئەمڕۆش سێشەممە 24.2.2026 گوندنشینە ئاوارەبووەکانی دەڤەری بەری گارێ لە سنوری قەزای ئامێدی کە نزیکەی 20 مانگە گوندەکانییان پێ چۆڵکراوە، بۆ دەربڕینی ناڕەزایەتی و گەیاندنی داواکارییان بۆ گەڕانەوەیان بۆ ناو گوندەکانییان خۆپێشاندانییان ئەنجامدا و ڕێگەی نێوان ئامێدی بۆ دێرەلووکیان داخست، تاوەکو ئێستاش هیچ بەرچاوڕوونییەک نییە کە گوندنشینانی ئەو ناوچەیە کەی دەتوانن بگەڕێنەوە بۆ ناو گوندەکانییان”.
لە سێ مانگی رابردوودا تورکیا 241 بۆردومانی بۆ سەر هەرێمی کوردستان ئەنجامداوە
