“هەڵپاچینی درەختەکان لەم وەرزەدا دەبێتەهۆی وشکبوون و نەخۆشکەوتنیان”

964+

شۆڕش قادری

بەڕێوەبەرایەتی باخچەکانی سلێمانی دەڵێت، بڕین و هەڵپاچینی درەختەکان لەم وەرزەدا دەبێتەهۆی وشکبوون و نەخۆشکەوتنیان.

بەڕێوەبەرایەتی باخچەکانی سلێمانی کۆمەڵێک رێنمایی بڵاوکردووەتەوە و دەڵێت، بۆ پاراستنی درەختەکانمان لە گەڕەک و کۆڵانەکان پابەندی ئەو رێنماییانە بن.

بەپێی رێنماییەکە، “لە وەرزی پاییزدا، کاتێک کە پلەی گەرما دادەبەزێت و گەڵای درەختەکان هەڵدەوەرێت، گەشەی درەختەکان سست دەبێت، لەم کاتەدا، بڕین و هەڵپاچینی درەختەکان بە شێوازێکی نازانستی، دەبێتەهۆی زیان گەیاندنێکی زۆر بە درەختەکان وەک وشکبوون یان نەخۆشکەوتنیان”.

دەقی رێنماییەکەی بەڕێوەبەرایەتی باخچەکانی سلێمانی؛

خۆبەدوورگرتن لە بڕین و هەڵپاچینی درەختەکان لە پاییزدا: لە وەرزی پاییزدا، درەختەکان لە قۆناغی متبوندان. بڕین و هەڵپاچینیان لەم کاتەدا دەبێتە هۆی لاوازبوونیان و کەمکردنەوەی توانایان بۆ بەرگەگرتنی سەرما و نەخۆشی.

ڕاوێژکردن بە شارەزایان: پێش ئەنجامدانی هەر کارێکی بڕین یان هەڵپاچین بۆ درەختەکانتان، تکایە تیمەکانی بەڕێوەبەرایەتی باخچەکان ئاگادار بکەنەوە. ئەوان دەتوانن ڕێنماییتان بکەن لەسەر کات و شێوازی دروست بۆ ئەنجامدانی ئەم کارانە، بەو پێیەی کە شارەزایی تەواویان هەیە لە بوارەکەدا و دەزانن چ جۆرە درەختێک چ جۆرە گرنگی پێدانێکی دەوێت.

پاراستنی جوانی و تەندروستی ژینگە: درەختەکان ڕۆڵێکی گرنگ دەبینن لە پاکژکردنەوەی هەوا و جوانکردنی ژینگەی نیشتەجێبوونمان. با هەموومان پێکەوە کار بکەین بۆ پاراستنیان و گرنگیدان پێیان، بۆ ئەوەی ژینگەیەکی تەندروست و جوانمان هەبێت.

تیمەکانی بەڕێوەبەرایەتی باخچەکان ئامادەن. لە کاتی هەر پرسیارێک یان پێویستییەک بۆ یارمەتی سەبارەت بە درەختەکانتان، دەتوانن پەیوەندی بە بەڕێوەبەرایەتی باخچەکانەوە بکەن، بۆ پێشکەشکردنی هاوکاری و ڕێنمایی پێویست.

بە پابەندبوونمان بەم ڕێنماییانە، دەتوانین دڵنیا بین لەوەی کە درەختەکانمان بە شێوەیەکی تەندروست گەشە دەکەن و سوودەکانیان بۆ ئێمە و نەوەکانی داهاتوو دەمێنێتەوە.

شارەوانی سلێمانی: هەڵپاچینی درەخت قەدەغەیە

گرووپێكی پێنجوێن خولی هەڵپاچینی درەختیان کردەوە