کەشتییەکى نەفەرهەڵگرى بە زیاتر لە 267 سەرنشینەوە ژێرئاو کەوت

وریا فەتاح
کەمێک پێش ئێستا، لە کەناراوەکانی شاری “گیرنە” لە قوبرسی باکوور (بەشی ژێر دەسەڵاتی تورکیا)، کەشتییەکی نەفەرهەڵگر نقوم بوو و  لە ئێستاشدا هەوڵێکی گەورە بۆ رزگارکردنی سەرنشینەکانی دەستی پێکردووە.
ئەرهان ئاریکلی، وەزیری ئاوەدانکردنەوە و گواستنەوەی قوبرسی باکوور بە میدیاکانی وڵاتەکەی راگەیاندووە؛ کەشتییەکە لە جۆری (کاتاماران) بووە و بە کۆی گشتی 267 کەسی تێدابوو، کە 259 یان گەشتیار و 8 کەسیشیان تیمی کەشتییەکە بوون.
بەپێی زانیارییە سەرەتاییەکان، رووداوەکە کاتێک روویداوە کە بەشی پێشەوەی کەشتییەکە بە هۆکارێکی نادیار دەستی بە ئاوتێزان کردووە. هەرچەندە کاپتنی کەشتییەکە هەستی بە مەترسییەکە کردووە و هەوڵی داوە بگەڕێتەوە بۆ کەناراوەکان، بەڵام بەهۆی ئەوەی تەنها چەند کیلۆمەترێک لە وشکانییەوە دوور بوون، نەیتوانیوە کۆنترۆڵی بکات و کەشتییەکە نقوم بووە.
دەستبەجێ تیمەکانی پاسەوانی کەناراوەکان و هێزەکانی فریاگوزاری گەیشتوونەتە شوێنی رووداوەکە، هاوکات ژمارەیەکی زۆر لە بەلەمە مەدەنییەکانی ناوچەکەش چوونەتە بەهاناوەچوونی سەرنشینەکانەوە.

لە ئێستادا سەرجەم نەخۆشخانەکان و تیمەکانی فریاکەوتنی تەندروستی لە شاری گیرنە خراونەتە حاڵەتی ئامادەباشییەوە. بەڵام تا ئێستا ئامارێکی فەرمی لەبارەی قوربانییان یان دۆخی تەندروستیی سەرنشینەکانەوە بڵاونەکراوەتەوە.