قایمقام خوێندکارم بوو
مامۆستا باڵا بەرزەکەی پێنجوێن خانەنشین کرا
964+
کامیار کەمال – پێنجوێن
مامۆستا محەمەد پیاوێکی باڵابەرزە و بە باڵا شمشاڵیەکەیدا دەناسرێتەوە، جا لەهەر جێگایەکی پێنجوێن وابڵێی دەزانن، کە مەبەستت مامۆستا محەمەدی وانەی کوردییە.
ئەو ماوەی 30 ساڵە لە کەرتی پەروەردەیی پێنجوێن خزمەت دەکات، ئەمڕۆ خەڵات کرا و بەڕەسمی خانەنشین بوو.
محەمەد عەبدوڵا، مامۆستای خانەنشین بە 964ی وت، بە خۆبەخی دەستی کردووە بە وانەوە وتنەوە لە ساڵی 1991یەوە و ئەو کات کە پێنجوێن چۆڵکراو و وێرانە بووە لە ژێر خێمە دەرسی وتوەتەوە، بەڵام بە رەسمی لە ساڵی 1996 دامەزراوە.
ئەو لە ماوەی خزمەتی پەروەردەیی، تا ئاستی بەڕێوەبەر رۆشتووە و بە بەشێکی زۆری قوتابییەکانی پێنجوێن دەرسی وتوەتەوە کە ئێستا پزیشک، ئەندازیار و دادوەرن، لەنێو هەموویاندا قایمقامی پێشووی پێنجوێن، زانا رەحمان خوێندکاری ئەو بووە.
ئەم مامۆستایە ئەمڕۆ یەکشەممە، لەگەڵ 21 فەرمانبەر و مامۆستای دیکە، لە بەڕێوەبەرایەتی پەروەردەی پێجوێن خانەنشین کران.
پێداچوونەوە: ئەحمەد مستەفا
