دیمهنێك له مهراسیمی خهڵاتكردنهكه... وێنه: رێكخراوى ئاینده بۆ پاراستنى ژینگه.
ساڵى داهاتوو ناوهنده پهروهردهییهكان دهگرێتهوه
له چهمچهماڵ ئهو ناوهنده تهندروستیانه خهڵاتكران كه زۆرترین رێژهى سهوزاییان ههیه
فهرهاد حهسهن
رێكخراوێكی ژینگهیی ئه ناوهنده تهندروستیانهى قهزاى چهمچهماڵى خهڵات كرد كه زۆرترین رێژهى سهوزاییان ههیه، ئهمهش دواى ئهوهى پێشتر ههڵسنگاندن و بهدواداچوونى ژینگهیی بۆ رێژهى سەوزایی ئهم ناوەندانه كردبوو.
رێکخراوی ئایندە بۆ پاراستنی ژینگە، بەههماههنگی بەڕێوەبەرایەتی تەندروستی چەمچەماڵ و بەشی باخچەکانی شارەوانین ئهم كارهى كردووه.
هەرسێ مەڵبەنده تەندروستییهكان راپەڕین لە چەمچەماڵ، شەهید عومەر قەرەتامۆری لە ناحیەی شۆڕش و شەهید حەمەغهفور ئاغجەلەری لە ناحیەی ئاخجەلەر، خەڵاتکران.
مهعروف مهجید، سهرۆكى رێكخراوهكه به 964ـى راگهیاند، ساڵانە لە رۆژی ژینگەی کوردستان ئهم خهڵاته دابهش دهكهن و ئهمساڵیش ئهم ناوهنده تهندروستیانهیان خهڵاتكردووه كه زۆرترین رێژهى سهوزاییان ههیه.
وتیشی “پێشتر هەڵسەنگاندنمان بۆ دیاریكردنى رێژهى سهوزایی لە نەخۆشخانە و چەند ناوەندێکی تەندروستی چەمچەماڵ کردووه”.
بۆ ساڵی داهاتوو، رێكخراوهكه بڕیاریداوه كارهكانى ههڵسهنگاندنى رێژهى سهوزایی تهنیا لهناوهنده تهندروستییهكان نهكات و ناوەندە پەروەردەییەکانیش بگرێتهوه.
مهعروف مهجید، بەڵێنی دا بۆ لەمەودا زیاتر خزمەتی ناوەندە تەندروستییەکان و فەرمانگە حکومییەکان بکات بۆ فراوانکردنی رێژەی سەوزای لە نەخۆشخانە و سەنتەر و مەڵبەند و ناوەندە تەندروستییەکانی تر.
