دیمەنی ناحیەی بنگرد وێنە: سۆشیاڵ میدیا
"رێگای دوكان بۆ دەڤەری راپەڕین دادەخەن"
گوندەكانی بەری مەرگە سبەی خۆپیشاندان دەكەن و رێگا دادەخەن
964+
ئەحمەد محەمەد – سلێمانیت
دانیشتووانی دەڤەری مەرگە بڕیاریانداوە، سبەی خۆپیشاندان بكەن لە بەرامبەر خراپی رێگاوبان و نەبوونی كارەبای نیشتیمانی و یەكێكیش لە ئەندامانی دەستەی خۆپیشاندەران دەڵێت، لەگەڵ دەستپێكی خۆپیشاندان یەكسەر رێگای دوكان – رانیە دادەخەین.
لە بارەی خۆپیشاندانەكەوە، هۆگر حاجی ئیسماعیل، ئەندامی دەستەی خۆپیشاندەرانی ناحیەی بنگرد بە 964ـی وت، سبەی دووشەممە 13.1.2025، كاتژمێر 8:30ـی بەیانی لە نێوانی گوندی هەنجیرە و ناحیەی بنگرد، لە ئاستی خرێ سەر ئاوێ خۆپیشاندان دەكەین و دەستبەجێش رێگاكە بە رووی ئۆتۆمبێلی بچوك وگەورە دادەخرێت.
وتیشی، كۆدەنگی لە نێوان دانیشتووانی ناحیەی بنگرد و 10 گوندی ناوچەكە دروست بووە بۆ گرتنی رێگاكە، لەوانەش هەر یەك لە ناحیەی بنگرد و گوندەكانی هەنجیرە، بەردەشانی سەروو و خواروو، سێوكان، مەرگە، ئاوەژێ، قەرەتەپە و مەمەنداوا، گەنجانی ناوچەكە رای ریش سپی گوندەكانیشیان وەرگرتووە و سبەی دانیشتووانی ئەو گوندانە لە شوێنەكە ئامادە دەبن.
ئاماژەی بەوەش كرد، گرفتی رێگامان هەیە و رێگاوبانمان زۆر خراپ بووە، كارەبای نیشتمانیمان بۆ 7 كاتژمێر كەمكراوەتەوە لە 5:00ـی ئێوارە بۆ 12:00ەی شەو كارەبامان هەیە و مۆلیدەشمان نییە، بۆیە لە بڕیارەكە پاشگەزنابینەوە، شۆفڵ و گەڵابەش ئامادەكراوە و سبەی رێگاكە دادەخەین.
ئەمە لە کاتێکدایە چەند رۆژێکە دانیشتووانی ناحیەی خەلەکان، بەهۆی تەواونەکردنی پڕۆژەی دوو سایدی رانیە – دوکان و کەمی کاتژمیرەکانی کارەبا گردبوونەتەوە و رێگەی سەرەکی رانیە – سلێمانییان داخستووە، رێگای قەرەسرد، كە دەكەوێتە قەزای دوكان، پارێزگای سلێمانی و دەڤەری راپەڕین بەیەكەوە دەبەستێتەوە، بەداخستنی رێگەكەش بەتەواوی هاتوچۆكردنی نێوان ئەو ناوچەیە دەپچڕێ.
