لە هەولێر چەند زەوییەکی زیادەڕۆ تێکدران کە ئاوی زێراب بۆ ئاودانی سەوزە بەکارهاتووە – وێنە: پارێزگای هەولێر
لە دەورووبەری هەولێر
ئاوی زێرابیان بۆ ئاودانی سەوزە بەکاردەهێنا؛ زەوییەکانیان تێکدرا و خۆیشیان دەستبەسەر کران
964+
شۆڕش قادری
لە دەورووبەری هەولێر هەندێک کەس بە مڵهوڕی زەوی شارەوانی بەکاردێنن بۆ باخچە و سەوزەوات و ئاوی ئاوەڕۆ و زێرابیش بۆ ئاودانی سەوزەکانیان بەکاردەهێنن، بەرپرسانی کشتوکاڵ و شارەوانی پێیانزانیوە، شۆفڵیان بردووەتە سەر زەوییەکان، تێکیانداون و لایانبردوون، سەرپێچیکارانیش لێپێچینەوەیان لەگەڵدا کراوە.
هێمن سەید موارد بەڕێوەبەری گشتی کشتوکاڵی هەولێر بە 964ـی وت، “ئەمڕۆ سێشەممە 7.1.2025 و لەسەر راسپاردەی ئومێد خۆشناو پارێزگاری هەولێر و بەهەماهەنگی قائیمقامیەتی قەزای ناوەندی شارەکەمان، هەستاین بە لابردنی سەرجەم ئەو زیادەڕۆیانەی کە لەسەر زەوی شارەوانی بە ناوی چاندنی سەوزە کرابوون”.
“ئەو زەویانە لە دەورووبەری هەولێرن و بەشێوەیەکی زۆر مەترسیدار و ناتەندورست ئاوی ئاوەڕۆ و زێراب بۆ ئاودانیان بەکارهاتووە، دواتر هەر ئەو سەوزانە دەرخواردی خەڵک دەدەن و دەبێتە هۆکاری گواستنەوەی نەخۆشی بۆ هاوڵاتیان”، هێمن سەید موراد وای وت.
ئاماژەی بەوەشکرد، ئەو کەسانەی کە ئەو کارەیان کردووە، دەستبەسەر کراون و لێپێچینەوەیان لەگەڵدا دەکرێت.
بەڕێوەبەری گشتی کشتوکاڵی هەولێر وتیشی، هەڵمەتەکانیان بۆ تێکدانی و لابردنی ئەو زیادەڕۆیانە بەردەوام دەبێت و هەر کەس و لایەنێک کاری لەو شێوەیە بکات سزا دەدرێت.
هەڵمەتی لابردنی زیادەڕۆیی لە چەند شوێنێکی هەولێر بەڕێوەچوو
