پڕۆژەیەكی گەورەی ئاوەڕۆی سندوقی لە هەولێر دروست دەكرێت

964+

ئەرسەلان عەبدوڵا

لە هەوڵە بەردەوامەكان بۆ رێگریكردن لە دروستبوونی لافاو لە هەولێر، بەردی بناغەی پرۆژەیەكی ئاوەڕۆ دانرا، كە پارێزگای هەولێر دەڵێت گەورەپڕۆژەیە و لە شەقامی كەركوك تا كەندی قەتەوی درێژدەبێتەوە.

پڕۆژەكە ئەمڕۆ سێشەممە 24.12.2024 لە رێوڕەسمێكدا بەردی بناغەی بۆ دانرا.

وەزیری شارەوانیی هەرێمی كورستان ساسان عەونی، لە بارەی پڕۆژەكەوە بۆ میدیاكان وتی، پرۆژەی دروستكردنی ئاوەڕۆی سندوقی لە شەقامی كەركوك نزیك گردەڕەشە، تا كەندی قەتەوی، زیاتر لە 6 ملیار دیناری بۆ تەرخان كراوە و لەسەر بودجەی وەزارەتی شارەوانی و گەشتوگوزار جێبەجێ دەكرێت، ماوەی 450 رۆژی تەقویمی بۆ دیاریكراوە، كە بە قەبارەی جیاواز جێبەجێ دەكرێت و مەنهۆڵ و كەناڵی كراوەشی تێدایە.

پڕۆژەكە وەك لە راگەیاندنی پارێزگای هەولێردا هاتووە، بە مەبەستی كەمكردنەوەی مەترسییەكانی لافاو و باشتركردنی سیستمی ئاوەڕۆیە لە هەولێر.

لە ماوەی ئەمساڵدا چەندین پڕۆژەی ئاوەڕۆ و فراوانكردنی رێڕەوی ئاو و دروستكردنی بەربەست لە هەولێر و دەوروبەر ئەنجامدراون، هەموو ئەوانەش لە ترسی دروستنەبوونی لافاوە، كە لەم ساڵانەی دوایی چەند حاڵەتێكی لافاو روویاندا و زەرەر و زیانی زۆری بە هاوڵاتیان گەیاند، بە تایبەتی لافاوەكەی ساڵی 2021 لە نزیك ناحیەی دارەتوو.

بۆ رێگری لە لافاو مەنهۆڵ و ئاوەڕۆی چەند گەڕەکێک پاککرانەوە