ئۆكتۆبەری پەمەیی
کەمپینێک بۆ توشبووانى شێرپەنجەى مەمک راگەیەنرا
964+
ئەحمەد محەمەد _ سلێمانی
هۆتێلەکانى میلینیۆمى سەربە گروپى کۆمپانیانى فاروق، لەچوارچێوەی هەڵمەتی ئۆكتۆبەری پەمەیی، کەمپینێکى بۆ توشبوانى شێرپەنجەى مەمک راگەیاند.
كەمپینەکە کۆمەک لە رێگەی پسولەی میوانانی هۆتێل و رێستورانتەكانی ملینیۆم كۆدەكاتەوە، بەشێوەیەک هەر كەسێك سەردانی هۆتێلەكە دەكات لەگەڵ هەر خواردن و خواردنەوەیەك دەتوانێت بڕە پارەیەك ببەخشێت.
هیوا حەمەخان، بەڕێوەبەری هۆتێلەكانی ملینیۆم بە 964ـى وت،”هەڵمەتەكە لەئەمڕوە دەستپێدەكات و پێشوازی لەهەر شوێنێكی دیكە دەكەین كە بەشداربێت لەكەمپینەكە”.
ئاماژەی بەوەشدا، لە كۆتایی مانگی ئۆكتۆبەر كۆی ئەو كۆمەك و پیتاكەی كە كۆدەكرێتەوە، هۆتێلەكانی ملینیۆم هاوتای بڕی ئەو كۆمەكە دەخاتە سەر حسابەكە و لەكۆتایی مانگی ئۆكتۆبەر پێشكەشی نەخۆشخانەی هیوای دەكەن.
دکتۆر. یاد نەقشبەندى، بەڕێوەبەرى نەخۆشخانەى هیوا لە سلێمانى بە 964ـى وت،” لە 10 مانگى ساڵى 2023 دا، 415 حاڵەتى توشبوون بە شێرپەنجەى مەمکمان تۆمار کردووە، بەڵام لە 10 مانگ ئەمساڵ 479 حاڵەتمان تۆمارکردووە، بەمەش بەراورد بە پار، ئەمساڵ 64 حاڵەت زیادى کردووە”.
پێداچوونەوە: وریا فەتاح
