پار 70 هەزار هاتبوون
دەروازەی حاجی ئۆمەران چاوەڕێی 300 هەزار زیارەتکارى ئێرانى دەکات
964+
ئاکام غەفور-سۆران
ماوەی پێنچ رۆژە هاتنی زیارتکارانی ئێرانى لە دەروازەی حاجی ئۆمەران دەستی پێکردوە، چاوەڕێ دەکرێت 300 هەزار زیارەتکار لە دەروازەکەوە بچنە نەجەف و کەربەلا.
سیروان بارزانی، وتەبێژی دەروازەی نێودەوڵەتی حاجی ئۆمەران، بە 964ـی وت،”ماوەی سێ ساڵە لە رێگای دەروازەى حاجى ئۆمەرانەوە زیارتکارانی شیعە سەردانی نەجەف و کەربەلا دەکەن، بۆ ئەو مەبەستە تەواوی ئامادەکاریمان کردوە”.
دەروازەکە دوو وێستگەی سەرەکی کە یەکێکیان لە حاجی ئۆمەرانە و ئەوەى تر لە پێشەنگاى نێودەوڵەتى هەولێر بۆ کتێبە ئامادەى کردووە و دوو وێستەگەی لاوەکیش لە کانی ماران و بازگای شێراوەیە ئامادەن بۆ پشودانی زیارتکاران.
” لە دەروازەکە 58 گێتی پاسپۆرت ئامادەکراوە کە لە خولەکێکدا دەتوانن 58 کەس بەڕێبکەن، نزیکەی دوو هەزار پاس بۆ گواستنەوەی زیارتکاران ئامادەیە کە رۆژانە دەتوانن 50 هەزار کەس بگوازنەوە”، وتەبێژى دەروازەکە واى وت.
بەپێى ئامارەکانى دەروازەکە، ساڵی رابردوو لە دەروازەی نێودەوڵەتی حاجی ئۆمەرانەوە 70 هەزار زیارتکارى ئێرانى سەردانی نەجەف و کەربەلایان کردوە و زیاتر لە 50 هەزاریش هەر لە رێگای ئەو دەروازەیەوە گەڕاونەتەوە ئێران.
پێداچوونەوە: وریا فەتاح
