دیمهنى یهكێك له مۆلیده‌كان كه بههۆى گازى خراپهوه دوكهڵ بڵاودهكاتهوه... وێنه: 964+
لیژنه: سزایان كراوه‌ته سێ ملیۆن دینار
ده‌سته‌ى ژینگه له كوالێتى گازى مۆلیده‌كانى هه‌ولێر ده‌كۆڵێته‌وه
964+
فه‌رهاد حه‌سه‌ن
ده‌سته‌ى ژینگه له كوالێتی ئه‌و گازه ده‌كۆڵێته‌وه، كه مۆلیده‌كان به‌كارى ده‌هێنن و پێیوایه كوالێتییه‌كه‌ى خراپه و ژینگه پیس ده‌كات، لیژنه‌ى مۆلیده ئه‌هلییه‌كانیش ده‌ڵێت، نزیكه‌ى 90%ـى گازى مۆلیده‌كان له رووى كوالێتییه‌وه كۆنتڕۆڵ كراوه.
ده‌سته‌ى پاراستنى ژینگه و به‌ڕێوه‌به‌رایه‌تیى نه‌وت و كانزاكان كۆبوونه‌وه و له باره‌ى كوالێتى ئه‌و گازه‌وه قسه‌یان كرد، كه مۆلیده ئه‌هلییه‌كان به‌كارى ده‌هێنن و داواكرا كوالێتییه‌كه‌ى باش بكرێت بۆ ئه‌وه‌ى نه‌بێته هۆى پیسبوونى ژینگه.
قارەمان مەولود، لێپرسراوی لیژنەی مۆلیدە ئەهلییەکانی هەولێر بە 964ى وت، پێشتر كوالێتیى گازى مۆلیده‌كان خراپ بووه، به‌ڵام دواى چاودێری و لێپرسینه‌وه‌یان ئێستا باشتره.
وتیشی “سزاى پێبژاردنى گازى خراپمان له یه‌ك ملیۆن دیناره‌وه، كردووه‌ته سێ ملیۆن دینار و ته‌نیا له مانگى رابردووش نزیكه‌ى 15 خاوه‌ن مۆلیده سزا دراون”.
به قسه‌ى لێپرسراوى لیژنه‌كه، ئێستا مۆلیده ئه‌هلییه‌كانى ناو شار به نزیكه‌ى 90%ـى كۆنتڕۆڵكراون و گازى خراپ به‌كار ناهێنن.
ئاماژه‌ى به‌وه‌ش كرد، ئاگادارى مۆلیده‌كانى ده‌وروبه‌ریش نین، كه له قه‌زا و ناحیه‌كاندا هه‌ن، چونكه ئه‌وان له‌لایه‌ن به‌ڕێوه‌به‌رى ناحیه و قایمقامه‌كانەوە چاودێریی ده‌كرێن.
