لە سلێمانی پیازی کوردی دەستناکەوێ

+964
ئەحمەد مستەفا – هەولێر

پیازی كوردی لە بازاڕەكانی سلێمانی نەماوە و لە ئێستادا خواستێکی زۆر لەسەر پیازی ئێرانی هەیە، ئەوەی لەناو خەڵكدا باوە.

لە عەلوەی سلێمانی پیازی كوردی دەستناكەوێت، ئەو پیازەشی كە هەیە ئێرانی و سوری و توركی و ئۆكرانیە، هەرچەندە كوالیتیەكەی زۆر بەرز نییە، بەڵام هاوڵاتیان خواستێكی زۆریان بۆ پیازی ئێرانی هەیە.

سەروەر عەلی، سەرۆکی سەندیکای کشتوکاڵی عەلوەی سلێمانی بە +964ی راگەیاند، ئەمڕۆ سێشەممە، ھەریەک لە
پیازی ئێرانی، تورکی، سوری، ئۆکرانی و کرواتی لە عەلوەی سلێمانی ھەن، بەڵام خواست زیاتر لەسەر پیازی سپییە كە ئێرانییە.

هاوڵاتیان زیاتر بەدوای پیازی كوردی دەگەڕێن، بەڵام ئەگەر دەستیان نەكەوێت داوای پیازی ئێرانی دەكەن.

یەك كیلۆ پیازی ئێرانی لە بازاڕدا بە هەزار و 350 دینارە کە قەبارە مامناوەند و رەنگ سپییە، بەڵام رەنگە سورباوەكەی بە 850 دینارە و پیازی كرواتی نرخەكەی لە نێوان 800 بۆ 900 دینار دایە و پیازی توركیش بە 1000 دینارە.

بە قسەی سەروەر عەلی، ناتوانن مەزەندەی رۆژانەی ھاوردەکردنی پیاز بکەن، کاتژمێر بە کاتژمێر دەگۆڕدرێت و ئەوەش لەسەر خواست بەندە.