سێ کارمەندی کارەبای هەولێر بریندار بوون

توانا نەقی

لە کاتی کارکردن سێ کارمەندی کارەبای هەولێر بە تەزووی کارەبا بەسەختی بریندار بوون و ئێستا لە ژێر چاودێری پزیشکدان.

ئەمڕۆ سێشەممە، وەزارەتی کارەبا بڵاویکردەوە، سێ کارمەندی بەڕێوەبەرایەتی دابەشکردنی کارەبای هەولێر 1 لەکاتی کارکردنیان لە چاککردنەوەی فیدەری 17ـەی رۆژئاوا بەهۆی تەزووی کارەباوە بەسەختی برینداربوون.

تاڤگە کاکەسور بەڕێوەبەری کارەبای یەکی هەولێر بە 964ـی وت، ئەو کارمەندانەمان لە کاتی کارکردن تەزووی کارەبا لێی داون و تووشی سووتاوی جەستەبوون.

وتیشی، نازانن رێژەی سووتاوییەکەیان چەندە بەڵام، لە ژێر چاودێری پزیشکدان و چارەسەر وەردەگرن لە نەخۆشخانەی ئیمێرجنسی هەولێر.

بە پێی ئەو وێنانەی وەزارەتی کارەبا بڵاویکردووەتەوە و پارێزگاری هەولێر سەردانی بریندارەکانی کردووە لە دەم وچاو و دەست و قاچیاندا تووشی سووتان بوون.