دوای 10 ساڵ باڵەخانەی قایمقامیەتی بەردەڕەش ئاوڕی لێ دەدرێتەوە

964+
زەید کۆچەر – دهۆک

دوای ئەوەی لە ساڵی 2013 باڵەخانەیەکی نوێ بۆ قایمقامیەتی قەزای بەردەڕەش دروستکرا و بریار وابوو بگوازرێتەوە بۆ باڵەخانەی نوێ، بەڵام قەیرانی دارایی کارەکانی راگرت و تاوەکو ئیستا وەکو خۆی ماوەتەوە.

ئێستا دەست بە دروستکردنی کراوەتەوە و بڕیارە لەماوەی نۆ مانگدا تەواو بکرێت.

ئیسماعیل مستەفا رەشید، قایمقامی قەزای بەردەڕەش بە 964ی وت، “لە ساڵی 2013 باڵەخانەیەکی نوێ بۆ قایمقامیەتی قەزای بەردەڕەش دروستکرا، بەڵام دواتر قەیرانی دارایی و شەڕی داعش و کۆرۆنا تەواوکردنی کارەکانی راگرت و دواتر زیانێکی زۆر بەر باڵەخانەکە کەوتووە، بەڵام بە خۆشحاڵییەوە دوای سەردانی وەزیری ناوخۆ بۆ پارێزگای دهۆک رەزامەندیدا لەسەر تەواوکردنی پڕۆژەکە”.

وتیشی، دەستکراوە بە تەواوکردنی پڕۆژەی باڵەخانەی نوێی قایمقامیەت و دراوە بە بەڵێندەرێک بەڵێنی داوە لە ماوەی پێنج مانگدا تەواوی بکات و خۆی نۆ مانگ مۆڵەتی پێدراوە و دواتر کەلوپەلی نوێی بۆ دابیندەکرێت.

سەبارەت بە باڵەخانەی کۆنی قایمقامیەتی قەزای بەردەرەش بڕیار وایە چەند فەرمانگەیەکی حکومی بگوازرێتەوە بۆ باڵەخانەکە و کاری خۆیان تێدا بکەن، کە تاوەکو ئیستا بە کرێ لەنێو چەند باڵەخانەیەکدان.

پێداچوونەوە: موحسین عومەر

رێگا سەرەکیەکانی بەردەڕەش نەکارەبا و نە هێمای هاتوچۆی نییە