نرخی یەک گۆڕی خێزانیی لە پڕۆژەی گۆڕستانی ميسر پێنج دەفتەر دۆلارە

964+
موحسین عومەر

یەکێک لە گەورەترین کۆمپانیاکانی خانووبەرە لە میسر مشتومڕێکی بەرفراوانی لەنێو سۆشیال میدیادا دروستکردووە، دوای ئەوەی پڕۆژەی گۆڕستانەکانی بۆ فرۆشتنی بە بڕی 50 هەزار دۆلار راگەیاند.

پڕۆژەی گۆڕستانەکان دەکەوێتە سەر رێگای سوێس لە بەرامبەر ناوچەی دەرگای چوونە ژوورەوەی پارێزگای قاهیرە.

کۆمپانیاکە لە رێکلامەکانیدا روونیکردووەتەوە، گۆڕەکان وەک گۆڕستانی خێزانیی دابەشکراون کە رووبەرەکەیان دەگاتە 40 مەتر چوارگۆشە، هەروەها هەریەک لەو گۆڕستانە خێزانییانە دەتوانرێت هەشت کەس لە خۆبگرێت، چوار کەس بۆ پیاوان و چوار کەس بۆ خانمان.

لەم پڕۆژەیەدا خزمەتگوزارییەکانی وەک مزگەوت و هۆڵی بۆنەکان و شوێنی وەستانی ئۆتۆمبێلی تێدایە.

کۆمپانیاکە ئاماژەی بەوەشکردووە، ئەو گۆڕستانانە بە بوونی کامێرای چاودێری و خزمەتگوزاری بەردەوامی چاککردنەوە بۆ هەموو یەکەکانی گۆڕستان و تابلۆی ئایەتەکانی قورئانی پیرۆز لەسەر هەموو گۆڕستانەکان جیا دەکرێنەوە.