ئەڵمانەکان بەشدارن
شوێنەواری دهۆک بە دوای ئاسەواری سەردەمی هاتنی ئیسلامدا دەگەڕێت
964+
هەژین فەتاح
بەڕێوەبەرایەتیی شوێنەواری دهۆک بە هەماهەنگی لەگەڵ زانکۆی تۆبنگنی ئەڵمانی كاری هەڵکۆڵینیان له شوێنه‌واری گرێباستکێی سەر بە قەزای سێمێلێ ده‌ستپێكردووه.
هەڵکۆڵین و گه‌ڕان له شوێنه‌وار له گرێباستکێی سەر بە قەزای سێمێل دەکرێت، به ئامانجی دۆزینه‌وه‌ی ئاسەوار و هێنانەدەره‌وه‌یه‌تی بە شێوازێکی زانستییانه.
بێکەس بریفکانی، بەڕێوەبەری شوێنه‌وار لە پارێزگای دهۆک، بە 964ی وت، له 2015 ئێمە كارمان له گرێباستکێ كرد و چەندین كه‌لوپه‌لی مێژوویی لەوێ بینراوە، بۆ سه‌رده‌می هاتنی ئیسلام تا نەینەوا 5 (یه‌كێكه له شارستانیه‌تییه‌كان له دۆڵی رافیده‌ین) ده‌گه‌ڕێته‌وه، دوای تەواوبوونی گرێبەسته‌كه، ئێستا جارێکی دیكه دووبارە كاری تێدا دەکەینه‌وه.
وتیشی، لە کاتی هەڵکۆڵیندا 2 جۆری شوێنەوار دۆزراونه‌ته‌وه، شوێنه‌وار هه‌یه ده‌گوازرێته‌وه و هه‌یه ناگوزارێته‌وه، ئه‌وانه‌ی ده‌گوازرێنه‌وه وه‌ك گۆزه و كه‌لوپه‌لی ناوماڵ و مۆر و شتی له‌و بابه‌ته‌ن، كه ده‌برێنه مۆزه‌خانه و لێكۆڵینه‌وه‌یان له‌سه‌ر ده‌كرێت، دواتر راپۆرت و كتێبی له‌سه‌ر ئاماده ده‌كرێت و له زانكۆ دێته بڵاوكرده‌وه.
ئاماژه‌ی به‌وه‌ش دا، ئه‌و شوێنه‌وارانه‌ی ناگوازرێنه‌وه، وه‌ك ژوور و ماڵ و شوێنن.
له پرۆسه‌ی ئه‌و هه‌ڵكۆڵینه‌دا نزیكه‌ی 100 كه‌س كار ده‌كه‌ن و خه‌ریكی گه‌ڕان و پشكنینن، كه له ژێر چاودێریی به‌ڕێوه‌به‌رایه‌تیی شوێنه‌واری دهۆك به‌ڕێوه‌ده‌چێت.
پێداچوونه‌وه: ئه‌رسه‌لان عه‌بدوڵا
