دادگای فیدراڵی لەسەر چەند سکاڵایەکی تایبەت بە هەرێم کۆدەبێتەوە

هاوبەش ئەبوبەکر

ئەمڕۆ دووشەممە، دادگای باڵای فیدراڵی عێراق تاوتوێی چەند سکاڵایەک دەکات، کە یەکێکیان پەیوەستە بە حکومەتی ھەرێم و بۆ ھەڵوەشاندنەوەی چەند مادەیەکی یاسای بودجە تۆمار کراوە.

ئەو سکاڵایەی کە پەیوەستە بە هەرێمەوە، لەلایەن مەسرور بارزانی سەرۆکی حکومەتی ھەرێمی کوردستان، لە دژی سەرۆکی ئەنجومەنی نوێنەرانی عێراق تۆمارکراوە و داوادەکات ژمارەیەک لە بڕگەکانی یاسای بودجە بە نادەستووری دابنرێن و ھەڵبوەشێندرێنەوە.

بڕگەکانی پەیوەست بە هەرێم تایبەتن بە دیاریکردنی رێژەی شایستەی دارایی ھەرێم لە بودجە و رادەستکردنی نەوت و شایستەی دارایی کۆمپانیاکانی نەوت و ھەروەھا رادەستکردنی داھاتی نانەوتی و خەرجکردنی پشکی ھەرێم لە بودجە، لەگەڵ چۆنیەتی چارەسەرکردنی کێشەی نێوان ھەولێر و بەغدا و بڕگەی پارێزگای ناڕازیی.

ھاوکات دادگای فیدراڵی تاوتوێی سکاڵاکەی سەرۆکوەزیرانی عێراق دەکات، کە لەسەر سەرۆکی ئەنجومەنی نوێنەرانی عێراق تۆماری کردووە و داوادەکات، 12 بڕگە و ماددەی یاسای بودجە بە نادەستووری دابینرێن و ھەڵبوەشێندرێنەوە.

یەکێکی دیکە لە سکاڵاکارەکان، مستەفا سەند ئەندامی لیژنەی داراییە لە پەرلەمانی عێراق، کە لەسەر سەرۆکوەزیران تۆماری کردووە و داوادەکات بڕیار بدرێت لەسەر ھەڵوەشاندنەوەی بڕیاری خەرجکردنی 400 ملیار دینار کە ساڵی رابردوو وەزارەتی دارایی وەک شایستەی دارایی ھەرێم و بەشێوەی قەرز خەرجی کردووە.