بۆ هەنگوین سێ داریان نیوەبڕاو کرد و پۆلیس بەدوایاندا دەگەڕێت

پێشەوا محەمەد

لە گوندی مەڕوەی قەزای پشدەر چەند کەسێک بۆ دەرهێنانی هەنگوین سێ داریان نیوەبڕاو کردووە و پۆلیس بەدوایاندا دەگەڕێت.

دانیشتوانی گوندەکە پۆلیسیان ئاگادار کردووەتەوە و ئەوانیش چوون بینیویانە دارەکان کونکراون و هەندێ لقیان لێ بڕاوەتەوە.

خەسرەو محەمەد، وتەبێژی پۆلیسی دارستان و ژینگەی ئیدارەی راپەڕین بە 964ـی راگەیاند، تا ئێستا نازانن ئەو کەسانە کێن، بەڵام دەزانن زیاتر لە کەسێکە و ئێستا سەرقاڵی لێکۆڵینەوەن بۆ دۆزینەوەیان.

وتیشی، “پێشتر حاڵەتی وا لەو گوندە رووی نەداوە و یەکەمجارە سێ دار بەو شێوەیە بۆ دەرهێنانی هەنگوین کون بکرێن و بەشێکی دارەکان ببڕدرێنەوە”.