پارێزگاری بانکی ناوەندی باس لە پێدانی قەرز بە هاوڵاتیانی هەرێم دەکات

هاوبەش ئەبوبەکر

لە سەردانێکیدا بۆ هەولێر، عەلی عەلاق پارێزگاری بانکی ناوەندی عێراق، لەگەڵ سەرۆکی کۆمەڵەی بانکە تایبەتییەکانی عێراق و نوێنەرانی بانکە تایبەتییەکان لە هەرێمی کوردستان کۆبووەوە.

لە کۆبوونەوەکەدا باس لە دامەزراندنی چەند بانکێک کراوە بۆ پشتگیریکردنی پڕۆژەی بچووک و مامناوەندی دارایی، کە هاوڵاتیان جێبەجێیان دەکەن.

بە گوێرەی راگەیەندراوێکی بانکی ئیسلامی کوردستان، ئەمڕۆ چوارشەممە 12.7.2023، گفتوگۆ لەسەر ژمارەیەک بابەت کرا، کە رووبەڕووی بانکەکانی هەرێم و عێراق دەبنەوە، وەک پەیوەندییەکانی دەرەوە، قەرزی دارایی، فراوانکردنی بانک، گشتگیری دارایی و دامەزراندنی بانک بۆ پشتگیریکردنی پڕۆژەی بچووک و مامناوەندی دارایی لە عێراق.

ئاماژە بەوەش کراوە، سەرۆکی کۆمەڵەی بانکە تایبەتییەکان لە کۆبوونەوەکە جەختی کردەوە، کە پێویستە کەرتی بانکی کار بکات بۆ دابینکردن و پێدانی پارە بە پڕۆژەکانی ژێرخانی ئابووری، کە راستەوخۆ خزمەتی هاوڵاتیان دەکات، کە ئەمەش یارمەتیدەر دەبێت لە پشتیوانییکردن لە کەرتی تایبەت و چارەسەرکردنی ئەو کێشانەی رووبەڕووی وڵات دەبنەوە.

ئێستا بەشێک لە بانکەکانی سەر بە حکومەتی عێراق، قەرز دەدەن بە هاوڵاتیان و فەرمانبەران و بڕی قەرزەکە تا 150 ملیۆن دینار دەچێت.